टेंभुर्णी – “आर्थिक अडचण दूर करतो, पैशांचा पाऊस पाडतो” असे आमिष दाखवत अघोरी विधीच्या नावाखाली लाखो रुपयांची फसवणूक करणाऱ्या आढेगाव येथील भोंदू महाराजासह त्याच्या भावाला टेंभुर्णी पोलिसांनी अटक केली आहे. या प्रकरणामुळे परिसरात मोठी खळबळ उडाली असून अंधश्रद्धेच्या नावाखाली सुरू असलेल्या फसवणुकीचा पर्दाफाश झाला आहे.
याबाबत फिर्यादी निलेश बाळासाहेब भोईटे (वय 32, रा. लक्ष्मी टाकळी, ता. पंढरपूर) यांनी टेंभुर्णी पोलीस ठाण्यात तक्रार दाखल केली आहे. फिर्यादीची सोशल मीडियाच्या माध्यमातून फेब्रुवारी 2024 मध्ये आरोपी नाना विरकर उर्फ गुरुमाऊली व विकास विरकर (रा. आढेगाव) यांच्याशी ओळख झाली होती. आर्थिक अडचणीत असलेल्या फिर्यादीला आरोपींनी मौजे आढेगाव येथील त्यांच्या मठात बोलावले.
तेथे महाराज उर्फ नाना गुरुमाऊली यांनी फिर्यादीचा आधार क्रमांकावरून पॅनकार्ड क्रमांक अचूक सांगून त्यांचा विश्वास संपादन केला. त्यानंतर “तुमची आर्थिक अडचण दूर करतो, पैशांचे मार्ग खुले करतो” असे सांगत विविध वस्तू दिल्या. मात्र कोणताही फायदा झाला नाही. उलट अघोरी विधी करण्याच्या नावाखाली वेळोवेळी मोठी रक्कम उकळण्यात आली.
यानंतर आरोपींनी फिर्यादीला “नव शिव सह्याद्री ॲग्रो फार्म लिमिटेड” या कथित कंपनीत भागीदार करतो, असे आमिष दाखवून बनावट कागदपत्रे दिली. काही दिवसांनी संबंधित कंपनी अस्तित्वात नसल्याचे लक्षात आल्यानंतर फिर्यादीने आरोपींकडे पैशांची मागणी केली असता त्याला धमकावण्यात आले.
या प्रकरणी टेंभुर्णी पोलीस ठाण्यात गुन्हा रजिस्टर क्रमांक 326/2026 नुसार भारतीय न्याय संहिता कलम 338 सह महाराष्ट्र नरबळी आणि इतर अमानुष, अनिष्ट व अघोरी कृत्यांना प्रतिबंध अधिनियम तसेच भारतीय वन्यजीव संरक्षण अधिनियमांतर्गत गुन्हा दाखल करण्यात आला आहे.
गुन्हा दाखल होताच टेंभुर्णी पोलीस ठाण्याचे प्रभारी अधिकारी तथा परी सहाय्यक पोलीस अधीक्षक राहुल आत्राम यांनी स्वतः तपासात सहभाग घेत दोन विशेष पथके तयार केली. त्यांच्या मार्गदर्शनाखाली पोलिसांनी रात्रीत शोधमोहीम राबवत आरोपी
1. पांडुरंग उर्फ नाना उर्फ माऊली महाराज बापूराव विरकर (वय 22)
2. विकास बापूराव विरकर (वय 25, रा. विरकर वस्ती, वडोली ता. माढा)
यांना 8 मे 2026 रोजी अटक केली.
दोन्ही आरोपींना न्यायालयात हजर केले असता न्यायालयाने 13 मे 2026 पर्यंत पोलीस कोठडी सुनावली आहे.
या गुन्ह्याचा पुढील तपास पोलीस उपनिरीक्षक सागर गायकवाड करीत आहेत.
ही कारवाई पोलीस अधीक्षक अतुल कुलकर्णी, अपर पोलीस अधीक्षक प्रीतम यावलकर, सहाय्यक पोलीस अधीक्षक अंजना कृष्णा मॅडम यांच्या मार्गदर्शनाखाली परी सहाय्यक पोलीस अधीक्षक तथा प्रभारी अधिकारी राहुल आत्राम, पोलीस उपनिरीक्षक सागर गायकवाड, सहाय्यक पोलीस उपनिरीक्षक विलास रणदिवे, पोलीस हवालदार संदीप गिरमकर, संतोष पाटेकर, सुरज मुलानी, संदीप साखरे यांच्या पथकाने केली.
