सोलापूर : मी सूचना, दंड वगैरे काही करत नाही. अतिक्रमित गाड्या थेट जागेवरच निष्काशीत करतो. यामुळे कारवाईस अडथळा करू नका. अतिक्रमण करू नका. कारवाई अडथळा केल्यास गुन्हा दाखल करण्यात येईल, असा इशारा महापालिका अतिक्रमण प्रतिबंधक विभागाचे अधीक्षक जगन्नाथ बनसोडे यांनी सात रस्ता येथील कारवाईदरम्यान संबंधित विक्रेत्यांना दिला.
सोलापूर महापालिका अतिक्रमण प्रतिबंधक विभागाच्या वतीने आज सायंकाळी मोठ्या पोलीस बंदोबस्तात सात रस्ता येथील बिग बजार लगतच्या अतिक्रमित चायनीज व भेळ गाड्यांवर कारवाई केली. मोठ्या फौज फाट्यासह अतिक्रमण विरोधी पथक या ठिकाणी दाखल झाले. येथील भेळच्या गाड्या जागेवरच निष्काशीत करण्यात आल्या. इतर चायनीज व भेळ च्या गाड्यांवर कारवाई करत असताना काही विक्रेत्यांनी दंड करा पण गाड्या निष्काशीत करू नका, गाड्या सोडा अशी विनंती अतिक्रमण प्रतिबंधक विभागाचे अधीक्षक जगन्नाथ बनसोडे यांना केली. तर दुसरीकडे ज्यांच्या गाड्या निष्काशीत केल्या त्यांनी कारवाई पूर्णपणे करा.
कुणालाही सोडू नका, अशी मागणी केली. यावेळी पुन्हा काही विक्रेत्यांनी दंड करून गाड्या सोडा, आम्ही पुन्हा या परिसरातही दिसणार नाही अशी विनवणी केली. त्यावर अधीक्षक जगन्नाथ बनसोडे यांनी मी सूचना अथवा दंड करत नाही तर थेट गाड्या निष्काशीत करतो. यामुळे कुणीही अडथळा करू नका. कारवाई करू द्या. अडथळा केल्यास थेट गुन्हा दाखल करण्यात येईल. जर गाड्या सोडल्या तर कारवाई करणाऱ्यांवर अन्याय होईल, असा आक्रमक इशारा दिला. त्यानंतर विरोध मावळला.
दरम्यान, या ठिकाणी अतिक्रमित दोन भेळच्या गाड्या जागेवरच जेसीबीच्या साह्याने निष्काशीत करण्यात आल्या तर दोन गाड्या जप्त करण्यात आल्या आहेत, अशी माहिती अधिक्षक जगन्नाथ बनसोडे यांनी दिली. शहरात सार्वजनिक ठिकाणी रस्त्याला अडथळा होणारे अतिक्रमण हटविण्याची मोहीम सातत्याने सुरूच राहणार आहे, असे बनसोडे यांनी स्पष्ट केले. महापालिका आयुक्त डॉ. सचिन ओम्बासे यांच्या आदेशानुसार उपअभियंता तपन डंके यांच्या नियंत्रणाखाली ही कारवाई करण्यात येत आहे.
सोलापूर शहरात रस्त्यावर कुणीही अडथळा, अतिक्रमण करू नये. तसे आढळून आल्यास महापालिका अतिक्रमण प्रतिबंधक विभागाच्या वतीने तत्काळ कारवाई करण्यात येईल, असे आवाहन अधीक्षक जगन्नाथ बनसोडे यांनी केले आहे.
