सोलापूर – पानगाव प्राथमिक आरोग्य केंद्रातील वैद्यकीय सेवांबाबत गंभीर तक्रारी समोर आल्यानंतर आरोग्य प्रशासन खडबडून जागे झाले असून, संबंधित प्रकरणांची सखोल चौकशी सुरू करण्यात आली आहे. अपघातग्रस्त रुग्णाला वेळेत प्राथमिक उपचार न मिळाल्याचा आरोप तसेच गर्भवती महिलांच्या प्रसूतीसाठी पैशांची मागणी केल्याच्या तक्रारींमुळे या प्रकरणाला गांभीर्य प्राप्त झाले आहे.
या पार्श्वभूमीवर आरोग्य विभागाच्या अधिकाऱ्यांनी पानगाव आरोग्य केंद्राला भेट देत प्रत्यक्ष पाहणी केली. आरोग्य केंद्रातील सेवा, उपलब्ध मनुष्यबळ, रुग्णसेवा आणि तक्रारींशी संबंधित बाबींचा आढावा घेण्यात आला. तक्रारींमध्ये तथ्य आढळल्यास संबंधितांवर कठोर कारवाई केली जाईल, असा इशारा प्रशासनाने दिला आहे.
दरम्यान, ग्रामीण भागातील नागरिकांना दर्जेदार आणि मोफत आरोग्य सेवा देण्यासाठी शासन प्रयत्नशील असताना अशा प्रकारच्या तक्रारी गंभीर स्वरूपाच्या आहेत. त्यामुळे चौकशी अहवालानुसार जबाबदार व्यक्तींवर शिस्तभंगाची कारवाई करण्यात येणार असल्याचे संकेत प्रशासनाकडून देण्यात आले आहेत. या घटनेमुळे ग्रामीण आरोग्य यंत्रणेतील सेवा गुणवत्ता, जबाबदारी आणि पारदर्शकतेचा मुद्दा पुन्हा ऐरणीवर आला असून नागरिकांमध्येही आरोग्य सेवांबाबत जागरूकता वाढविण्याची गरज व्यक्त होत आहे.
कोट
रुग्णांना वेळेत उपचार मिळणे आणि शासकीय आरोग्य सेवा पारदर्शकपणे उपलब्ध होणे ही प्रशासनाची प्राथमिक जबाबदारी आहे. पानगाव येथील घटनेबाबत प्राप्त झालेल्या तक्रारींची चौकशी सुरू असून संबंधित तालुका आरोग्य अधिकारी व कर्मचाऱ्यांच्या भूमिकेचीही तपासणी करण्यात येत आहे. असे जिल्हा परिषदेचे अध्यक्ष दीपक वैद्य यांनी सांगितले.
