महागाईच्या आकडेवारीमुळे कॉमेक्सवर सोन्या आणि चांदीच्या दरांवर दबाव दिसून येत आहे. सोन्याची किंमत प्रति औंस २,१६० डॉलरच्या जवळ पोहोचली आहे. अमेरिकेतील वाढत्या महागाईचा परिणाम कमोडिटी मार्केटवर दिसून येत असून MCX वर सोन्याचा दर किंचित वाढीसह व्यवहार करत आहे. तर मार्केट तज्ज्ञांनी येत्या काळात सोने आणि चांदीच्या दरात आणखी मोठी वाढ होण्याची शक्यता वर्तवली आहे.
काही दिवसांपूर्वी सोन्याचा भाव ६३ हजार रुपये प्रति १० ग्रॅमच्या आसपास ट्रेंड करत होता तर आता सोन्याने ६६ हजार रुपये प्रति १० ग्रॅमवर झेप घेतली आहे. तुम्ही सोन्या-चांदीची खरेदी करण्याचा विचार करत असाल तर त्यांचे नवीन दरांची तुम्हाला माहिती असली पाहिजे. गेल्या काही दिवसांत सोने-चांदीच्या दरात घसरण सुरू होती तर आता सोन्याने उच्चांकी पातळीवर मुसंडी मारली आहे. सध्या सोन्याचा भाव ६६ हजार रुपये प्रति १० ग्रॅम आहे, एकेकाळी ६३ हजार रुपया खाली होता. मात्र, अलीकडच्या सततच्या तेजीमुळे दरात वाढ होताना दिसत असून सोन्याबरोबरच चांदीच्या दरातही वाढ झाली आहे.
सोन्या-चांदीचे आजचे दर काय
आज, बुधवारी, सोन्याचा एप्रिल वायदा MCX वर ६५,५२० रुपये प्रति १० ग्रॅमवर खुला झाला तर सोन्याचा भाव ६५,४७४ रुपयांवर घसरला आहे. तसेच जून सोन्याचा वायदा दरांनी उसळी घेतली आणि ६६,०४२ रुपयांवर उघडला. याशिवाय MCX वर आज म्हणजेच बुधवारी, मे चांदीची फ्युचर्स किंमत ७३,८१० रुपये प्रति किलोवर उघडली तर जुलै चांदीचे फ्युचर्स ७५,११० रुपयांच्या पातळीवर उघडली आहे. आज चांदीच्या दरात घसरण झाली आहे.
जागतिक बाजारात सोने-चांदीची किंमत
बुधवारी जागतिक बाजारात सोने आणि चांदीच्या दरात कमी नोंदवली गेली. कॉमेक्सवर सोन्याचे फ्युचर्स ०.१३% कमी होऊन २,१६३.२० डॉलर प्रति औंसवर व्यवहार करताना सोन्याची स्पॉट किंमत सध्या प्रति औंस २,१५७.९२ डॉलरवर पोहोचली आहे. त्याच वेळी, कॉमेक्सवर चांदीचे फ्युचर्स ०.३६% किंवा ०.०९ डॉलरने घसरून २४.३१ डॉलर प्रति औंसवर व्यवहार करत होते तर, स्पॉट चांदीचा भाव २४.०८ डॉलर प्रति औंसवर घसरला आहे.
