बार्शी – पुण्यश्लोक अहिल्यादेवी होळकर सोलापूर विद्यापीठाच्या २२ व्या ‘उन्मेष–सृजनरंगाचा’ युवा महोत्सवात कर्मवीर डॉ. मामासाहेब जगदाळे मुख्य रंगमंचावर लघुनाटिका स्पर्धा उत्साहात पार पडली. जिल्ह्यातील १९ संघांनी सहभाग घेत विविध ज्वलंत सामाजिक विषयांवर प्रभावी सादरीकरण करुन प्रेक्षकांना अंतर्मुख केले.
स्पर्धेचे परीक्षण डॉ. सतीश पावडे (वर्धा), डॉ. दिलीप महालिंगे (संभाजीनगर) आणि यतीन पवार (मुंबई) यांनी केले.
शिक्षणाचे बाजारीकरण, सरकारची शेतकरीविषयक धोरणे, जनगणनेच्या कामात गुंतविले जाणारे शिक्षक, मोबाईलच्या आहारी गेलेली तरुणाई, इंटरनेटमुळे कमी होत चाललेला माणसांमधील संवाद, विकाऊ मीडिया, स्वदेशीच्या नावाखाली होणारी लूट आणि शिक्षण व्यवस्थेची दुरवस्था अशा विविध विषयांना लघुनाटिकांमधून हात घालण्यात आला.
काही लघुनाटिकांमधून मोबाईलच्या अतिवापरामुळे माणसांमधील प्रत्यक्ष संवाद कमी होत असल्याचे प्रभावीपणे दाखविण्यात आले. कठीण प्रसंगातच खरी नाती ओळखता येतात, हा संदेशही एका सादरीकरणातून देण्यात आला. मोबाईलच्या दुष्परिणामांवर अनेक संघांनी वेगवेगळ्या अंगाने भाष्य केले.
निवडणुकीवर आधारित लघुनाटिकेतून मतदानाचा हक्क आणि मतदार नोंदणीचे महत्त्व अधोरेखित करत मतदारांना मतदान करण्याचे आवाहन करण्यात आले. शाळांमधील शिक्षकांवर लादल्या जाणाऱ्या अशैक्षणिक कामांचा बोजा, विद्यार्थ्यांपासून दुरावणारे शिक्षक आणि शिक्षण व्यवस्थेतील प्रश्नही वास्तवदर्शी पद्धतीने मांडण्यात आले.
प्रत्येक संघाला सादरीकरणासाठी ८ ते १० मिनिटांचा अवधी देण्यात आला होता. मर्यादित वेळेत प्रभावी आशय मांडण्याचे आव्हान विद्यार्थ्यांनी समर्थपणे पेलले. संवाद, अभिनय, प्रकाशयोजना आणि संगीताच्या जोरावर लघु नाटिकांनी प्रेक्षकांना अंतर्मुख केले.
