सोलापूर – पर्यावरण संवर्धन केवळ शासकीय योजनांपुरते मर्यादित न राहता ते प्रत्येक नागरिकाच्या दैनंदिन जीवनाचा भाग व्हावे, या उद्देशाने सोलापूर जिल्ह्यात १ ते ७ नोव्हेंबरदरम्यान ‘ब्रिक्स शाश्वत जीवनशैली सप्ताह २०२६’ साजरा करण्यात येत आहे. पाणी, वीज आणि नैसर्गिक संसाधनांची बचत, प्लास्टिकचा वापर कमी करणे तसेच कचऱ्याचे योग्य व्यवस्थापन अशा कृतींतून पर्यावरण रक्षणाचा संदेश गावागावांत पोहोचविण्यावर जिल्हा परिषद प्रशासनाचा भर आहे. जिल्हा परिषदेचे मुख्य कार्यकारी अधिकारी कुशल जैन यांनी ही माहिती देत नागरिकांना अभियानात सक्रिय सहभागी होण्याचे आवाहन केले.
‘एक आठवडा, सात कृती, एक पृथ्वी’ ही या अभियानाची संकल्पना आहे. मिशन अंतर्गत ग्रामपंचायती, शाळा, अंगणवाड्या, महिला बचत गट, युवक मंडळे आणि विविध शासकीय विभागांच्या सहभागातून जनजागृतीपर उपक्रम राबविण्यात येणार आहेत. पर्यावरणपूरक जीवनशैली स्वीकारण्यासाठी मोठ्या बदलांची नव्हे, तर दैनंदिन सवयींमधील छोट्या सुधारणांची गरज असल्याचा संदेश या माध्यमातून दिला जाणार आहे.
सप्ताहाच्या पहिल्या दिवशी, १ नोव्हेंबरला मिशन शपथ, योग, व्यायाम, प्रभात फेरी आणि वृक्षारोपणातून आरोग्यदायी जीवनशैलीचा संदेश दिला जाणार आहे. २ नोव्हेंबरला अनावश्यक वीज वापर टाळण्याबाबत, तर ३ नोव्हेंबरला पाणी बचत, जलसंवर्धन आणि पारंपरिक जलस्रोतांच्या संरक्षणाबाबत जनजागृती केली जाणार आहे.
४ नोव्हेंबरला तृणधान्यांचा वापर, अन्नाची नासाडी रोखणे आणि ओल्या कचऱ्यापासून कंपोस्ट खतनिर्मितीवर भर दिला जाईल. ५ नोव्हेंबरला एकल वापराच्या प्लास्टिकला पर्याय म्हणून कापडी पिशव्यांचा वापर आणि प्लास्टिक संकलन मोहीम राबविली जाईल. ६ नोव्हेंबरला ई-कचऱ्याचे संकलन व योग्य विल्हेवाट, तर ७ नोव्हेंबरला परिसर स्वच्छता, कचऱ्याचे स्रोतावरच वर्गीकरण आणि ‘रिड्यूस, रियूज, रिसायकल’ या त्रिसूत्रीचा प्रसार केला जाणार आहे.
या उपक्रमांची प्रभावी अंमलबजावणी करण्यासाठी पंचायत समिती आणि ग्रामपंचायत स्तरावर नियोजन करण्यात येणार आहे. पर्यावरण संवर्धनाची जबाबदारी प्रत्येक नागरिकाची असल्याने पाणी वाचविणे, वीज बचत करणे आणि कचऱ्याचे वर्गीकरण करणे अशा सवयी अंगीकारून या अभियानाला लोकचळवळीचे स्वरूप द्यावे, असे आवाहन सीईओ कुशल जैन यांनी केले आहे.
