सोलापूर : जग मे बुद्ध का नाम है, यही भारत की शान है ..जय भीम… असा जयघोष करत बुद्ध जयंती निमित्त भारतीय बौद्ध महासभेच्या वतीने सोलापूर शहरात मंगलमय वातावरणात मिरवणूक काढण्यात आली.
सजवलेल्या आकर्षक रथातून तथागत गौतम बुद्ध आणि भारतरत्न डॉ. बाबासाहेब आंबेडकर यांच्या मूर्तीची मिरवणूक काढण्यात आली. माता रमाबाई आंबेडकर नगर येथील धम्मगंध बुद्ध विहार येथे पुष्पांजली व बुद्ध वंदना घेण्यात आली. शहराध्यक्ष अमित गायकवाड यांच्या हस्ते धम्म ध्वजारोहण करण्यात आले. यावेळी समता सैनिक दलाने मानवंदना दिली. भारतरत्न डॉ. बाबासाहेब आंबेडकर उद्यान येथून या मिरवणुकीस प्रारंभ झाला. प्रारंभी जिल्हा अध्यक्ष सत्यजित जानराव , जिल्हा सरचिटणीस बाबासाहेब क्षीरसागर , शहराध्यक्ष अमित गायकवाड यांच्या हस्ते पूजन करून सामुदायिक बुद्ध वंदना घेऊन या मिरवणुकीस प्रारंभ झाला.
त्यानंतर पुढे दानमय बुद्ध विहार येथे पुष्पांजली व वंदना घेण्यात आली. सम्राट चौक मार्गे मिलिंद नगर येथील विश्वरत्न डॉ. बाबासाहेब आंबेडकर अस्थिविहार प्रेरणाभूमी येथे अभिवादन करण्यात आले. दरम्यान, नवी पेठेतील महापालिका शिक्षण मंडळ कार्यालय येथील (जुनी नगरपालिका) क्रांतीसूर्य ज्योतीबा फुले, सावित्रीबाई फुले आणि बोधिसत्व डॉ. बाबासाहेब आंबेडकर यांच्या प्रतिमेस पुष्पांजली वाहून पुढे पार्क स्टेडियम जवळील डॉ. आंबेडकर पुतळ्यास अभिवादन करण्यात आले. त्यानंतर डफरीन चौक मार्गे बुद्ध नगर फॉरेस्ट येथील डॉ. आंबेडकर मेमोरियल हायस्कूलच्या प्रांगणातील बोधीवृक्षाचे पूजन करून सामुदायिक बुद्ध वंदना घेऊन या मिरवणुकीचा समारोप करण्यात आला. जिल्हा कोषाध्यक्ष दत्तात्रय सिद्धगणेश यांनी स्वागत केले तर जिल्हा सरचिटणीस बाबासाहेब क्षिरसागर यांनी आभार मानले. शिस्तबद्धरित्या शांततेत ही मिरवणूक काढण्यात आली.
यावेळी जिल्हा कोषाध्यक्ष दत्तात्रय सिद्धगणेश, जिल्हा महिला सरचिटणीस नंदा काटे , केंद्रीय शिक्षक अण्णासाहेब वाघमारे, जिल्हा संघटक धम्मरक्षिता कांबळे, रोहित जाधव , प्रा. जगन्नाथ शिंगे, धम्मपाल माने, यशवंत साबळे, बाबू रणखांबे, जनार्दन मोरे , विशाल ढेपे , सुमित डोलारे , राजेंद्र बाबरे , प्रसाद लांबतुरे , कमल सोनवणे, वैशाली जानराव, विशाल चतुर , राजेश सुरवसे
आदींसह पदाधिकारी, कार्यकर्ते सहभागी झाले होते.
दरम्यान, सोलापूर शहरात विविध सामाजिक संस्था, संघटनांच्या वतीने बुद्ध जयंती उत्साहात साजरी करण्यात आली. विविध ठिकाणी बुद्ध मूर्तीची प्रतिष्ठापना करण्यात आली होती. सामुदायिक त्रिशरण पंचशील बुद्ध वंदना घेण्यात आली. खीर आणि लाडू वाटप करण्यात आले.
