सोलापूर – महाराष्ट्र क्रिकेट असोसिएशनच्या महिला वरिष्ठ गटाच्या सुपर लीग क्रिकेट स्पर्धेत सोलापूरच्या संघाने आपली विजयाची लय कायम राखली आहे.
गुरुवारी आणि शुक्रवारी झालेल्या सलग दोन सामन्यांत सोलापूरने अनुक्रमे रिक्रिएशन पुणे आणि कोल्हापूर संघाचा पराभव करून स्पर्धेत वर्चस्व निर्माण केले. या दोन्ही विजयांत अष्टपैलू साक्षी वाघमोडे हिने चकाकणारी कामगिरी केली. तिला आर्या उमाप व प्रतिभा माशाळे यांनी साथ दिली
कोल्हापूरवर ४ गडी राखून मात
शुक्रवारी झालेल्या चुरशीच्या लढतीत सोलापूरने कोल्हापूरचा ४ गडी राखून पराभव केला. प्रथम फलंदाजी करताना कोल्हापूरचा संघ ४९.१ षटकांत २०१ धावांवर सर्वबाद झाला. कोल्हापूरच्या अनुजा पाटीलने ५४ धावांची खेळी केली, मात्र सोलापूरच्या साक्षी वाघमोडेने ३७ धावांत ३ बळी घेत त्यांना रोखले. २०२ धावांचे आव्हान सोलापूरने ४०.५ षटकांत ६ गड्यांच्या मोबदल्यात यशस्वीरीत्या पूर्ण केले. सलामीवीर आर्या उमापने ९४ चेंडूंत १४ चौकारांसह ८५ धावांची धडाकेबाज खेळी केली, तर साक्षी वाघमोडेने फलंदाजीतही चमक दाखवत ४७ धावा जोडल्या. अष्टपैलू कामगिरीबद्दल साक्षीला ‘सामनावीर’ पुरस्काराने सन्मानित करण्यात आले.
पुण्याला १२० धावांनी नमवले
पुणे येथेच गुरुवारी झालेल्या सामन्यात सोलापूरने रिक्रिएशन पुणे संघाचा १२० धावांनी धुव्वा उडवला. सोलापूरने प्रथम फलंदाजी करताना निर्धारित ५० षटकांत ४ बाद २५८ धावांचा डोंगर उभा केला. यामध्ये साक्षी वाघमोडे (८७ धावा) आणि प्रतिभा माशाळे (७० धावा) यांनी शतकी भागीदारी करत भक्कम पाया रचला. आर्या उमाप (३२) आणि गौरी पाटील (२७) यांनीही मोलाची साथ दिली.
प्रत्युत्तरादाखल पुण्याचा संघ अवघ्या १५८ धावांत गारद झाला. सोलापूरच्या भक्ती पवारने ३, तर साक्षी वाघमोडे आणि स्नेहा शिंदे यांनी प्रत्येकी २ बळी घेऊन पुण्याच्या फलंदाजीचे कंबरडे मोडले.
सोलापूर महिला संघाच्या या यशाबद्दल सोलापूर डिस्ट्रिक्ट क्रिकेट असोसिएशनचे अध्यक्ष दिलीपराव माने, चेअरमन रणजितसिंह मोहिते पाटील, व्हाईस चेअरमन श्रीकांत मोरे, संयुक्त सचिव धैर्यशील मोहिते पाटील आणि चंद्रकांत रेबूरसू, खजिनदार संतोष बडवे व इतर पदाधिकाऱ्यांनी खेळाडूंचे अभिनंदन करून पुढील वाटचालीस शुभेच्छा दिल्या.
