राजस्थानच्या मुख्यमंत्रिपदासाठी बाबा बालकनाथ यांचं नाव आघाडीवर असताना आता त्यांनी एक पोस्ट केली आहे. त्यातून त्यांनी सूचक संकेत दिले आहेत. त्यांची पोस्ट लक्षवेधी ठरतेय.
राजस्थानच्या तिजाराचे भारतीय जनता पक्षाचे नवनिर्वाचित आमदार बाबा बालकनाथ यांचं नाव मुख्यमंत्रिपदाच्या शर्यतीत असताना आता नवा ट्विस्ट आला आहे. बालकनाथ यांचं नाव मुख्यमंत्रिपदासाठी चर्चेत असताना त्यांनी सोशल मीडियावर महत्त्वाची पोस्ट केली आहे. आपण मुख्यमंत्रिपदाच्या शर्यतीत नसल्याचे संकेत त्यांनी यातून दिले आहेत. मीडिया आणि सोशल मीडियावर सुरू असलेल्या चर्चेकडे दुर्लक्ष करण्याचं आवाहन त्यांनी केलं आहे.
विधानसभा निवडणुकीचे निकाल येण्याआधीपासूनच बाबा बालकनाथ यांचं नाव मुख्यमंत्रिपदासाठी चर्चेत आहे. बालकनाथ अलवरचे खासदार आहेत. त्यांना भाजपनं विधानसभा निवडणुकीत उतरवलं. भाजप उत्तर प्रदेशप्रमाणे राजस्थानातही हिंदुत्ववादी चेहरा देईल, अशा चर्चा सुरू झाल्या. बाबा बालकनाथ राजस्थानचे योगी म्हणून ओळखले जातात. ते महंत आहेत. त्यांचं नाव मुख्यमंत्रिपदासाठी चर्चेत असताना त्यांनी केलेली पोस्ट लक्षवेधी आहे.
‘पक्ष आणि पंतप्रधान नरेंद्र मोदींच्या नेतृत्त्वात जनता-जनार्दनानं आधी खासदार आणि मग आमदार केलं. देशसेवेची संधी दिली. निवडणूक निकालानंतर सोशल मीडिया आणि मीडियावर सुरू असलेल्या चर्चांकडे दुर्लक्ष करा. मला अजून पंतप्रधानांच्या मार्गदर्शनाखाली अनुभव घ्यायचे आहेत,’ असं बाबा बालकनाथ यांनी पोस्टमध्ये नमूद केलं आहे.
बाबा बालकनाथ २०१९ मध्ये भाजपच्या तिकिटावर अलवर लोकसभा मतदारसंघातून विजयी झाले. यावेळी पक्षानं तिजारा विधानसभा मतदारसंघातून निवडणुकीच्या रिंगणात उतरवलं. त्यांनी काँग्रेस उमेदवार इम्रान खान यांचा पराभव केला. यानंतर त्यांनी लोकसभा सदस्यत्वाचा राजीनामा दिला. बालकनाथ मुख्यमंत्रिपदाचे प्रबळ दावेदार मानले जात होते. पण आता त्यांनी केलेली पोस्ट पाहता भाजप नेतृत्त्वानं त्यांच्याबद्दल वेगळा विचार केला असल्याचे संकेत मिळत आहेत. बालकनाथ यांच्यासोबतच मुख्यमंत्रिपदासाठी वसुंधरा राजे सिंधिया, किरोडी लाल मीणा, राज्यवर्धन सिंह राठोड आणि दिया कुमारी यांची नावं चर्चेत आहेत
