तामिळनाडूचे मंत्री उदयनिधी स्टॅलिन हे रावणाच्या खानदानातील असल्याची टीका बागेश्वर धामचे पंडित धीरेंद्र कृष्ण शास्त्री यांनी केलीय. मुख्यमंत्री एम.के. स्टॅलिन यांचे पुत्र असलेल्या उदयनिधी यांनी आक्षेपार्ह शब्दात सनातन धर्मावर केलेल्या टीकेले बागेश्वर धामच्या अधिकृत ट्विटर हँडलवरून हे प्रत्युत्तर देण्यात आलेय.
उदयनिधी स्टॅलिन यांनी अतिशय खालच्या भाषेत हिंदू धर्मावर टीका केली होती. तामिळनाडूत एका कार्यक्रमादरम्यान उदयनिधी म्हणाले होते की, “डेंग्यू, मलेरिया आणि कोरोनाचा तुम्ही केवळ विरोध करू शकत नाही. त्याने काही होते नाही. हे रोग समूळ नष्ट करावे लागतात. सनातन धर्माचे देखील असेच आहे” उदयनिधी यांच्या या बेताल वक्तव्याची देशभर निंदा होत असतानाच मध्यप्रदेशातील बागेश्वर धाम येथील आचार्य धीरेंद्र कृष्ण शास्त्री यांनी उदयनिधीच्या वक्तव्याची निर्भर्त्सना केलीय. बागेश्वर धामच्या अधिकृत ट्वीटर (एक्स) हँडलवरून प्रत्युत्तर देताना शास्त्री म्हणाले की, “उदयनिधी हे रावणाच्या खानदानातील आहेत. समस्त भारतीयांच्या हृदयावर त्यांनी आघात केलाय. हा प्रभू रामचंद्रांचा देश आहे. या भूमीवर सूर्य आणि पाणी राहील तोवर सनातन राहील. उदयनिधीसारखे भरपूर आले आणि गेले. अशा जनावरांना उत्तर देण्याची गरज नाही.” अशा शब्दात शास्त्री यांनी उदयनिधीच्या विधालाची निंदा केलीय. दरम्यान उदयनिधीच्या वादाग्रस्त वक्तव्यांनंतर त्यांच्या विरोधात दिल्ली पोलिसात 2 वेगवेगळ्या तक्रारी दाखल करण्यात आल्या आहेत. या तक्रारी सर्वोच्च न्यायालयाचे वकील विनीत जिंदल आणि हिंदू सेना प्रमुख विष्णु गुप्ता यांनी दाखलकेल्या आहेत.
