राज्यात महाविकास आघाडीचं सरकार सत्तेत असताना तिरुपती बालाजी मंदिराच्या प्रतिकृती निर्मितीसाठी नवी मुंबईतील जागा देण्याचा निर्णय झाला होता. हा निर्णय राज्यात सत्तांतर झाल्यानं मागं पडला होता. मात्र, देशभरातील लाखो भाविकांचं श्रद्धास्थान असलेल्या तिरुपती बालाजी मंदिराची प्रतिकृती नवी मुंबईत उभारण्याचा मार्ग मोकळा झाला आहे. राज्य सरकारच्या सहकार्यानं नवी मुंबईतील उळवे नोड येथील जागा यासाठी निश्चित करण्यात आली आहे. राज्य सरकारनं ५०० कोटी रुपयांची जागा नवी मुंबईत बालाजी मंदिर उभारण्यासाठी दिली आहे.
तिरुमाला तिरुपती देवस्थानचे प्रमुख वाय.वी. रेड्डी यांनी या संदर्भात माहिती दिली आहे. नवी मुंबईत तिरुपती तिरुमाला संस्थानच्या वतीनं मंदिर उभारलं जाणार आहे. त्याचा भूमिपूजन सोहळा ७ जून रोजी पार पडणार आहे. या सोहळ्याला राज्याचे मुख्यमंत्री एकनाथ शिंदे यांना आमंत्रित करण्यात आल्याची माहिती वाय. वी. रेड्डी यांनी दिली आहे.
तिरुपती तिरुमाला मंदिर व्यवस्थापनानं दोन वर्षांपूर्वी नवी मुंबईत बालाजी मंदिराची प्रतिकृती उभारण्याचा मानस व्यक्त केला होता. तत्कालीन महाविकास आघाडी सरकारनं तिरुपती तिरुमाला मंदिर व्यवस्थापनाची मागणी मान्य करत नवी मुंबईतील उळवे नोड येथील ५०० कोटींची जागा देण्याचा निर्णय घेतला होता. महाविकास आघाडी सरकारनं नवी मुंबईतील उळवे येथील १० एकर जमीन एप्रिल २०२२ मध्ये मंदिरासाठी देण्याचा निर्णय मंत्रिमंडळ बैठकीत मंजूर केला होता. नवी मुंबईतील ही जागा नव्या आंतरराष्ट्रीय विमानतळापासून जवळ आहे.
किती खर्च येणार?
तिरुपती तिरुमाला मंदिराच्या व्यवस्थापनानं नवी मुंबईत मंदिराची प्रतिकृती उभारण्यासाठी ७० कोटी रुपयांचा खर्च येणार असल्याची माहिती दिली आहे. वाय. वी. सुब्बा रेड्डी यांनी या रकमेची उभारणी दात्यांकडून आणि भक्तांकडून आलेल्या देणगीतून करण्यात येणार असल्याची माहिती दिली होती.
दरम्यान, महाविकास आघाडीच्या काळात हा निर्णय घेण्यात आला होता. दरम्यानच्या काळात सत्तांतर झाल्यानंतर मंदिर उभारणीबाबतचा निर्णय मागं पडला होता. आदित्य ठाकरेंनी या मुद्यावरुन राज्य सरकारवर टीका केली होती. आता त्यामधील अडचणी दूर झाल्या असून मुख्यमंत्री एकनाथ शिंदे यांच्या उपस्थितीत भूमिपूजन सोहळा पार पडणार आहे.
