सातारा : पुणे- बंगळुरु आशियाई महामार्गावर खंडाळा तालुक्यातील शिरवळजवळील ट्यूब कंपनीजवळ कंटेनरला पाठीमागून येणाऱ्या ट्रॅव्हल्सने जोरदार धडक दिली. या धडकेमुळं भीषण अपघात झाला. या अपघातात एक युवक जागीच ठार झाला असून, ड्रायव्हरसह चारजण जखमी झाले आहेत. सुरज भीमराव शेवाळे (वय २७, रा. टाळगाव शेवाळेवाडी, कराड) असे मृत तरुणाचे नाव आहे.
याबाबत पोलिसांनी सांगितले की, पुण्याहून साताराकडे जाणाऱ्या कंटेनरला (एनएल ०१ जी ४०६९) शिरवळजवळील ट्यूब कंपनीजवळ ट्रॅव्हल्सने (एमएच ०१ डीआर ०१०८) पाठीमागून जोराची धडक दिल्याने हा अपघात झाला. हा अपघात आज शनिवारी पहाटे सव्वाचार वाजेच्या सुमारास घडला. या अपघातात ट्रॅव्हलच्या समोरील बाजूचा चक्काचूर झाला आहे.
या अपघातात ट्रॅव्हल्समधून प्रवास करणाऱ्या युवकाचा मृत्यू झाला असून, सुरज भीमराव शेवाळे (वय २७, रा. टाळगाव शेवाळेवाडी, कराड ) असे त्याचे नाव आहे. तर राजश्री अनिल मोरे (वय २९, मु.पो. कराड, शंकर आनंदा बागडे (वय ४५, मु. पो. शिराळा). अमित महादेव पवार (वय २९, मु.पो. किंद्रेवाडी), अंकुश पाटील (वय ४८, मु. पनुंबरे, जि. सांगली) अशी जखमींची नावे आहेत. हे सर्वजण ट्रॅव्हल्समधून पुण्याहून आपल्या गावाकडे निघाले होती.
पहाटे घडलेल्या अपघाताची माहिती समजताच शिरवळ पोलीस ठाण्याचे पोलीस अंमलदार तुषार कुंभार, सुजित मेंगावडे व शिरवळ रेस्क्यू टिमच्या सदस्य तात्काळ घटनास्थळी हजर झाले. त्यांनी तातडीने जखमींना शिरवळ येथील प्राथमिक रुग्णालयात उपचारासाठी दाखल करण्यात आले.
शिरवळ पोलिसांकडून घटनास्थळाचा पंचनामा करून मृतदेह शवविच्छेदनासाठी रुग्णालयात नेण्यात आला. अपघातग्रस्त ठिकाणी शिरवळ परिसरातील नागरिक मदतीसाठी आले होते. या घटनेची माहिती मिळताच जखमींचे नातेवाईकही रुग्णालयात दाखल झाले आहेत. या अपघाताची नोंद शिरवळ पोलीस ठाण्यात झाले असून पोलीस तपास करीत आहेत.
दरम्यान, बुलढाणा जिल्ह्यात झालेल्या खासगी बसच्या अपघातात २६ जणांचा मृत्यू झाला. तर, सातारा जिल्ह्यातही एका तरुणाचा अपघाती मृत्यू झाल्यानं खासगी प्रवासी बसेसमधील प्रवासाबाबत प्रश्नचिन्ह निर्माण झालं आहे.
