शाहरुख खान नुकताच अमेरिकेतील लॉस एंजेलिसमध्ये शूटिंगसाठी गेला होता, तिथे त्याचा अपघात झाला आहे. रिपोर्टनुसार, यानंतर त्याच्यावर तातडीने शस्त्रक्रियाही करावी लागली. शाहरुखच्या नाकाला दुखापत झाल्याने रक्तस्त्राव सुरू झाला, त्यानंतर त्यावर शस्त्रक्रिया करण्यात आली. डॉक्टरांनी सांगितले की काळजी करण्यासारखे काही नाही आणि रक्तस्त्राव थांबवण्यासाठी किंग खानवर छोटी शस्त्रक्रिया करावी लागली. ऑपरेशननंतर शाहरुखच्या नाकावर पट्टी बांधली आहे. शाहरुख खान आता आपल्या देशात परतला आहे आणि घरी विश्रांती घेत आहे.
शाहरुखच्या आगामी सिनेमांबद्दल बोलायचं झालं तर या वर्षी रिलीज झालेल्या पठाण या चित्रपटाने सर्वत्र खळबळ उडवून दिली होती. जगभरात या चित्रपटाने जवळपास १ हजार कोटींची कमाई केली आहे. सध्या तो त्याच्या आगामी ‘जवान’ चित्रपटाच्या प्रदर्शनाची वाट पाहत आहे. या महिन्यातच चित्रपटाचा ट्रेलर प्रदर्शित होणार आहे. १२ जुलै रोजी ट्रेलर रिलीज होऊ शकतो असे सांगण्यात येत आहे. हा ट्रेलर टॉम क्रूझच्या मिशन इम्पॉसिबल: डेड रेकनिंग सिनेमावेळी थिएटरमध्ये दाखवला जाईल.
शाहरुख खान स्टारर ‘जवान’ हा चित्रपट अॅटली कुमार दिग्दर्शित करत आहे. शाहरुखची प्रॉडक्शन कंपनी रेड चिलीज एंटरटेनमेंट आणि गौरी खान यांनी याची निर्मिती केली आहे. याशिवाय शाहरुखकडे राजकुमार हिरानी यांचा ‘डंकी’देखील आहे, ज्यात विकी कौशल आणि तापसी पन्नू यांच्याही भूमिका आहेत.
