सोलापूर : शहरातील सार्वजनिक वाहतूक व्यवस्था अधिक सक्षम आणि पर्यावरणपूरक करण्याच्या दृष्टीने महापालिकेच्या १०० इलेक्ट्रिक बसेस प्रकल्पाला आता प्रत्यक्ष सुरुवात झाली आहे. स्वातंत्र्यदिनाच्या पूर्वसंध्येला शुक्रवारी पहिल्या टप्प्यातील २० इलेक्ट्रिक बसेस सोलापुरात दाखल झाल्या. रेल्वेच्या मालवाहतूक गाडीतून या बसेस शहरात आणण्यात आल्या असून उर्वरित ८० बसेस डिसेंबरअखेरपर्यंत दाखल होणार आहेत, अशी
महापौर विनायक कोंड्याल यांनी दिली.
केसरी रंगाच्या या इलेक्ट्रिक बसेस शहरातील विविध मार्गांवर धावणार असून, त्यामुळे प्रदूषण कमी करण्याबरोबरच सार्वजनिक वाहतूक व्यवस्थेला नवी दिशा मिळणार आहे. बसेस दाखल झाल्याने त्यांची तांत्रिक तपासणी, मार्ग निश्चिती आणि अन्य आवश्यक प्रक्रिया पूर्ण करून प्रत्यक्ष बससेवा सुरू करण्याच्या हालचालींना वेग आला आहे.
शहरात लवकरच ५० स्मार्ट बसस्टॉप उभारण्यात येणार आहेत. या बसस्टॉपवर सौरऊर्जेची सुविधा उपलब्ध करून देण्यात येणार असून, प्रवाशांना अधिक आधुनिक सुविधा देण्याचे नियोजन आहे.स्मार्ट बसस्टॉपवरील जाहिरात व्यवस्थेतून महापालिकेला उत्पन्न मिळणार आहे. बसस्टॉपच्या एका बाजूला खासगी कंपन्यांच्या जाहिराती, तर उर्वरित दोन बाजूंवर महापालिकेच्या जाहिराती असतील. जाहिरातींचा मक्ता लोटस कंपनीला देण्यात आला असून, कंपनीकडून प्रत्येक बसस्टॉपसाठी दरमहा १ हजार ५०० रुपये भाडे महापालिकेला मिळणार आहे.
शहराची वाढती लोकसंख्या आणि सध्याच्या सार्वजनिक वाहतूक व्यवस्थेवरील ताण लक्षात घेता १०० इलेक्ट्रिक बसेस महत्त्वपूर्ण ठरणार आहेत. जुन्या बससेवेच्या तुलनेत आधुनिक, पर्यावरणपूरक आणि अधिक सक्षम सार्वजनिक वाहतूक व्यवस्था उभारण्याचे महापालिकेचे उद्दिष्ट आहे.
—
