पंढरपूर – ग्रामीण भागातून येवून पंढरपूर शहरात रेकी करत महिलांच्या गळ्यातील सोनसाखळ्यांची चोरी करणाऱ्या चोरट्यास पंढरपूर शहर गुन्हे प्रकटीकरण शाखेने शिताफीने अटक करत त्याच्याकडून ६ लाख ५ हजार किंमतीचा (अंदाजे ०४ तोळे ०३ ग्रॅम सोने) मुद्देमाल हस्तगत केला आहे. चोरट्यास पोलिसांनी अटक केली असून त्यांच्या चौकशी दरम्यान इतर तीन गुन्हे देखील उघडकीस आणण्यात पोलिसांना यश आले आहे. आण्णा दशरथ लाडे (वय ३४, रा.सुपली, ता.पंढरपूर) असे या सोनसाखळी चोरट्याचे नाव आहे.
शहराच्या इसबावी भागातील विसावा मंदिर येथे फिर्यादी व तिची आई या दोघी दर्शन करून रात्री ०७.३० वा.चे सुमारास घराकडे निघाल्या होत्या. या दरम्यान, त्या दोघी नवशक्ती चौकात आल्या असता अचानक पाठीमागुन एका काळया रंगाच्या मोटार सायकलवर (एमएच १३-ईयू ९५९५) हेल्मेट घालुन आलेल्या इसमाने फिर्यादीचे गळ्यातील सोन्याचे मंगळसुत्र जबरदस्तीने हिस्कावुन चोरून नेले होते. याबाबत शहर पोलिसात गुन्हा दाखल झाला होता. त्या गुन्ह्याचा तपास पोलिसांकडून चालू होता असे असताना दि.२९ मार्च रोजी गुन्हे प्रकटीकरण शाखेतील कर्मचारी पेट्रोलिंग करीत असतांना माहिती मिळाली की, एक इसम हा पंढरपूर येथील सरगम चौक येथे आला आहे. त्याला पकडून त्याच्याकडून चोरीस गेलेले ४ तोळे ३ ग्रॅम वजनाचे मंगळसूत्र किंमत ६ लाख ५ हजार रुपये जप्त करण्यात आले आहे. आरोपीने गुन्हा करताना वापरलेली एक मोटार सायकल जप्त केली आहे. त्याच्याकडे अधिक चौकशी कोली असता त्याने पंढरपूर शहर पोलिस ठाणे हद्दीत आणखीन ३ गुन्हे केल्याची कबुली दिली.
ही कामगिरी पोलिस अधीक्षक अतुल कुलकर्णी, अपर पोलिस अधीक्षक प्रीतमकुमार यावलकर, सहा.पोलिस अधीक्षक प्रशांत डगळे, पोलिस निरीक्षक दशरथ वाघमोडे यांच्या मार्गदर्शनाखाली गुन्हे प्रकटीकरण शाखेचे पोलिस उपनिरीक्षक नितीन जगताप, राजेश गोसावी, स.पो.नि.शरद कदम, पो.ह.सिरमा गोडसे, सचिन हेबाडे, सोमनाथ पाटील, गणेश पवार, पो.ना. साहिल तांबोळी, कृष्णा पकाले, शहाजी मंडले, दीपक नवले, बजरंग विचुकले, हर्षद ठाकर यांनी केली आहे.
—————–
पाठलाग करून पोलिसांनी चोरट्याला केले जेरबंद
सोनसाखळी चोरटा एका काळ्या रंगाच्या मोटारसायकलवर हेल्मेट घालून सरगम चौक येथे थांबला आहे, अशी माहिती पोलिसांना मिळाली. पोलिस त्वरीत तेथे दाखल झाले. तेव्हा तो मोटारसायकलवरून पळून जाऊ लागला. संशय आल्याने गुन्हे प्रकटीकरण शाखेतील अंमलदार यांनी पाठलाग करून पकडले. त्याच्याकडे चौकशी केली असता त्याने आण्णा दशरथ लाडे (वय ३४, रा.सुपली) असे आपले नाव असल्याचे सांगीतले. आणि गुन्ह्याची देखील कबुली दिली.
