श्री रामजन्मभूमी तीर्थ क्षेत्र ट्रस्टने राम मंदिरातील रामलल्लाच्या प्राण प्रतिष्ठेच्या सोहळ्यासाठी देशभरातील नामवंत व्यक्तींना आमंत्रित पाठवले आहे. या यादीत तीन हजार व्हीव्हीआयपींसह एकूण सात हजार जणांना निमंत्रण पाठवण्यात आले आहे. ‘रामायण’मध्ये भगवान रामाची भूमिका साकारणारे अरुण गोविल आणि सीतेची भूमिका साकारणाऱ्या दीपिका चिखलिया यांचीही नावे या यादीत आहेत. मात्र आश्चर्याची बाब म्हणजे या यादीत बॉलिवूड क्वीन कंगना राणौतचे नाव नाही.
२२ जानेवारी २०२४ रोजी होणाऱ्या या महासोहळ्यासाठी पंतप्रधान नरेंद्र मोदी यांना आधीच आमंत्रित करण्यात आले आहे. आता ट्रस्टने दिग्गज क्रिकेटपटू सचिन तेंडुलकर, विराट कोहली, महानायक अमिताभ बच्चन आणि उद्योगपती मुकेश अंबानी यांच्यासह सुमारे सात हजार लोकांना आमंत्रणे पाठवली आहेत.
या सेलिब्रिटींच्या नावांचा समावेश
मनोरंजन विश्वाशी निगडित सेलिब्रिटींबद्दल बोलायचे झाले तर, या खास ऐतिहासिक कार्यक्रमासाठी अमिताभ बच्चन, रामायण मालिकेतील राम-सीता म्हणजेच दीपिका चिखलिया, अरुण गोविल, अक्षय कुमार, आशा भोसले यांना निमंत्रण पाठवण्यात आले आहे. या राम मंदिराचे उद्घाटन २२ जानेवारी २०२३ रोजी पंतप्रधान नरेंद्र मोदी यांच्या हस्ते होणार आहे. सकाळी ११ वाजता हा कार्यक्रम सुरु होऊ शकतो असे सांगण्यात येत आहे. सुमारे ३ तास हा कार्यक्रम सुरू असेल.
राम मंदिर उद्घाटन सोहळा
या यादीत ३ हजार व्हीव्हीआयपींसह ७ हजार लोकांची नावे आहेत. सेलिब्रिटींशिवाय १९९२ मध्ये मारल्या गेलेल्यांच्या कुटुंबीयांनाही निमंत्रण पाठवण्यात आले आहे. याशिवाय राष्ट्रीय स्वयंसेवक संघ (आरएसएस) प्रमुख मोहन भागवत, योगगुरू राम देव, उद्योगपती रतन टाटा, उद्योगपती गौतम अदानी ही मंडळीसुद्धा सहभागी होणार आहेत.
कंगना राणौत अयोध्येत गेली होती
गेल्या महिन्यात कंगना रणौत रामललाच्या दर्शनासाठी अयोध्येत गेली होती, त्यावेळी तिने राम मंदिर आंदोलनात प्राण गमावलेल्या लोकांची आठवणही काढली. तसेच मंदिर बांधणाऱ्या लोकांशी संवाद साधला. अयोध्या मंदिराबाबत ती यापूर्वीही वक्तव्ये करत होती. त्यामुळे कदाचित तिलासुद्धा आमंत्रण असेल असे सर्वांना वाटले होते पण तसे घडले नाही.
