स्टॅंडअप कॉमेडियन आणि बिग बॉस विजेता मुनव्वर फारूकी याला मध्यरात्री पोलिसांनी ताब्यात घेतल्याची माहिती आहे. फोर्ट परिसरात एका हुक्का पार्लरवर छापा मारण्यात आला होता. या छाप्याक पोलिसांनी १४ जणांना ताब्यात घेतलं होतं. यात मुनव्वर फारूकी देखील होता.
मुनव्वर फारूकीला पोलिसांनी ताब्यात घेतल्यानंतर एकच चर्चा सुरू झाली. पण पोलिसांनी चौकशी केल्यानंतर त्याला सोडल्याचं सांगण्यात येत आहे.
काय घडलं नेमकं?
फोर्ट परिसरात एका हुक्का पार्लरमध्ये हुक्क्याच्या नावाखाली तंबाखूचा वापर होत असल्याची माहिती मुंबई पोलिसांनी मिळताच, त्यांनी या ठिकाणी छापा टाकला होता. छाप्यात न मुनव्वर फारूकीसह १३ जणांना पोलिसांनी ताब्यात घेतलं होतं. मुनव्वरची चौकशी केल्यानंतर त्याला सोडण्यात आल्याचंही पोलिसांनी सांगितलं.
शेअर केला फोटो
दरम्यान, मुनव्वरनं पहाटे एक फोटो शेअर केलाय. या फोटोत तो मुंबई विमानतळावर असल्याचं पाहायला मिळत आहे. ‘ थकलोय, पण प्रवास करतोय’ असं कॅप्शनही त्यानं दिलंय.
बाबा सिद्दीकी यांची इफ्तार पार्टी
तसंच दोन दिवसांपूर्वी मुनव्वर बाबा सिद्दीकी यांच्या इफ्तार पार्टीसाठी पोहोचला होता. या पार्टीतले त्याचे अनेक फोटो, व्हिडिओ सोशल मीडियावर व्हायरल झाले आहेत.
कोण आहे मुनव्वर फारूकी?
मुनव्वर फारुकी हा एक स्टॅंडअप कॉमेडियन आहे. तो अनेक शो करायचा. पण राजकीय तसंच वादग्रस्त विनोदांमुळं तो अनेकदा वादात अडकला आहे. २०२२ मध्ये तो कंगना रणौतच्या ‘लॉकअप’ या रिअॅलिटी शोमध्ये दिसला होता. विशेष म्हणजे तो त्या सीझनचा विजेताही ठरला होता.
बिग बॉस १७ चा विजेता
तसंच तगडे स्पर्धक असताना त्यांना मात देत मुनव्वर फारूकीनं बिग बॉस १७ चं विजेतेपद पटकावलं आहे.
मुनव्वर आणि वाद
मुनव्वर एकदा नव्हे तर अनेकदा वादात अडकला आहे. काही वर्षांपूर्वी देवी-देवतांचा अपमान केल्याचा आरोप त्याच्यावर भाजपकडून आणि हिंदुत्ववादी संघटनेकडून करण्यात आला होता. यानंतर पोलिसांनी मुनव्वर फारुकीला अटक केली होती. इंदूरमध्ये मुनव्वर फारुकी यानं हिंदू देवी-देवता आणि केंद्रीय गृहमंत्री अमित शहा यांच्याबद्दल वादग्रस्त वक्तव्य केल्याचा आरोप स्थानिक भाजप आमदार मालिनी लक्ष्मणसिंह गौड यांचा मुलगा एकलव्य सिंह गौड यानं केला होता. मात्र, मुनव्वर फारुकी याच्याविरोधात कोणताही पुरावा आढळला नसल्याचं स्पष्टीकरण पोलिसांकडून देण्यात आलं होतं.
