करमाळा – जिल्हा परिषद प्राथमिक शाळा करंजे येथील विद्यार्थीनी कु. अन्वी संजय गर्ने हिने तालुकास्तरीय टॅलेंट हंट स्पर्धेत उल्लेखनीय यश मिळवत शाळेचा आणि गावाचा अभिमान वाढविला आहे. या स्पर्धेत लहान गटातील वक्तृत्व आणि कथाकथन या दोन्ही प्रकारांमध्ये तिने प्रथम क्रमांक मिळवून आपली प्रतिभा सिद्ध केली.
या स्पर्धेचे आयोजन शैक्षणिक गुणवत्तेला चालना देण्यासाठी तालुकास्तरावर करण्यात आले होते. विविध
शाळांमधील अनेक विद्यार्थ्यांनी सहभाग घेतला होता. कडक स्पर्धेत अन्वीने आपल्या सुंदर सादरीकरण, स्पष्ट उच्चार, विषयावरची पकड आणि आत्मविश्वासपूर्ण मांडणी यांच्या जोरावर परीक्षकांचे लक्ष वेधून घेतले. कु. अन्वीला शाळेचे मुख्याध्यापक, शिक्षकवृंद तसेच पालकांकडून भरभरून शुभेच्छा मिळत आहेत. तिच्या यशामागे मुख्याध्यापक श्री अमोल राऊत सर, वर्गीशक्षक श्री गणेश गरड सर, श्रीम. वैशाली रासकर मॅडम माधुरी कांबळे मॅडम, श्री नामदेव
घोगरे सर, श्री शिवलाल शिंदे सर व पालक श्री संजय गर्ने सर व गर्जे मॅडम यांचे मार्गदर्शन लाभले. शिक्षकांचे परिश्रम आणि विद्यार्थिनीचा सातत्यपूर्ण सराव हे महत्त्वाचे घटक ठरले आहेत.
या यशाबद्दल गावातील ग्रामस्थ, शिक्षणप्रेमी आणि पालकवर्ग यांनी अन्वीचे मनःपूर्वक अभिनंदन केले आहे. पुढील जिल्हास्तरीय स्पर्धेसाठीही अन्वीला शुभेच्छांचा वर्षाव होत असून, ती आणखी उंच भरारी घेईल असा विश्वास सर्वांनी व्यक्त केला आहे.
