सोलापूर : पदवीधर, पर्यावरणप्रेमी व पहिल्यांदा नगरसेविका झालेल्या ज्ञानेश्वरी देवकर यांना उपमहापौरपदाची संधी मिळाली आहे. नूतन उपमहापौरांचा परिचय पुढीलप्रमाणे आहे. प्रभाग क्रमांक 23 मधून त्या निवडून आल्या आहेत. त्या भाजप दक्षिण-पश्चिम मंडल अध्यक्ष महेश देवकर यांच्या पत्नी आहेत. बी.ए.समाजशास्त्र विषयात त्यांनी प्रथम क्रमांक प्राप्त केला. सुशिक्षित, अभ्यासू आणि सामाजिक जाणीव असलेल्या नेतृत्वाच्या त्या प्रतिनिधी आहेत.
मूळ माहेर धाराशिव जिल्ह्यातील कावळेवाडी, तर सध्या सोलापूर ही कर्मभूमी आहे. लहानपणापासूनच सामाजिक कार्याची आवड जपत गणेशोत्सव मंडळापासून ते भाजप मंडलाध्यक्षा असा त्यांचा प्रेरणादायी प्रवास आहे.शैक्षणिक जीवनात असतानाच राष्ट्रीय सेवा योजना माध्यमातून वृक्षलागवड, समाजोपयोगी उपक्रमांमध्ये सक्रिय सहभाग घेतला. तसेच इको नेचर निसर्ग संवर्धन सहकारी संस्था स्थापनेत प्रवर्तक म्हणून योगदान देत, त्या एक पर्यावरणप्रेमी कार्यकर्त्या म्हणून ओळखल्या जातात.
शिवजन्मोत्सवाच्या माध्यमातून छत्रपती शिवाजी महाराजांचे समभाव, एकजूट, स्वराज्यनिती, वृक्षसंवर्धनाची आज्ञापत्रे या मूल्यांचा प्रसार करत वृक्षलागवड, आरोग्य शिबिरे, शासकीय योजनांचा लाभ गरजूंना मिळवून देणे असे कृतीशील उपक्रम राबवले आहेत.
दरवर्षी भगवद्गीता, शिवमहापुराण प्रवचन, भजन यांसारखे आध्यात्मिक उपक्रम सातत्याने राबवले जातात. महामानव डॉ. बाबासाहेब आंबेडकर यांच्या “शिका, संघटित व्हा, संघर्ष करा” या विचारांनुसार विद्यार्थ्यांसाठी शैक्षणिक साहित्य वाटप त्यांच्याकडून करण्यात येते.
महात्मा बसवेश्वर महाराजांचे “कायकवे कैलास” (कामातच कैलास)
हा कर्मनिष्ठेचा संदेश, तसेच जय सेवालाल महाराज, संत रोहिदास महाराज यांच्या मानवतेच्या विचारांवर आधारित सामाजिक उपक्रम सातत्याने राबवले जातात. पुण्यश्लोक राजमाता अहिल्यादेवी होळकर यांच्या प्रेरणेतून मंदिर संवर्धन, आध्यात्मिक व सांस्कृतिक वारसा जपण्याचे कार्य सुरू असून सोलापूर विद्यापीठ परिसरात हजारो वृक्षलागवड केली आहे.
सोलापूरचे सुपुत्र अरण्यऋषी पद्मश्री कै. मारुती चितमपल्ली यांच्या निसर्गसंवर्धनाच्या कार्याचा वारसा पुढील पिढीपर्यंत पोहोचवण्यासाठी युवकांना प्रेरणा देण्याचे काम त्या करीत आहेत.
प्रभाग क्रमांक 23 मधील सिद्धेश्वर वनविहार (सुमारे 400 एकर जैवविविधतेने नटलेला परिसर) याचे संवर्धन व पर्यटन स्थळ म्हणून विकास करणे हे प्रमुख उद्दिष्ट आहे. “निसर्ग हाच गुरु – मानवता हाच धर्म – सेवा हेच कर्म”या विचाराने प्रेरित होऊन लोकसहभाग, लोकमत आणि मार्गदर्शनाच्या बळावर सेवा कार्य अखंड सुरू राहील.
आमदार सुभाष देशमुख साहेब आणि मनीष देशमुख यांच्या नेतृत्वाखाली सोलापूर शहरातील प्रश्न सोडवून सर्वांगीण विकासाचा संकल्प सातत्याने पुढे नेण्यात येईल. प्रभाग व सोलापूर शहराला नव्या उंचीवर नेणारा विकास निश्चित घडवून आणला जाईल, हा विश्वास त्या सर्व नागरिकांना देत आहोत.
वृक्षलागवड व संवर्धनाचे कार्य संत तुकाराम महाराजांच्या “वृक्षवल्ली आम्हा सोयरे वनचरे”
या विचारांनी प्रेरित असलेल्या उपमहापौर ज्ञानेश्वरी देवकर या सोलापूर शहरातील शाळा, महाविद्यालय परिसरात सातत्याने वृक्षलागवड व संवर्धनाचे कार्य सुरू आहे. त्याचबरोबर सोसायटीतील नागरिकांच्या दैनंदिन समस्या सोडवण्यासाठी त्या नेहमीच प्रयत्नशील असतात.
कोरोना महामारीच्या कठीण काळात हजारो रुग्ण, गरजू व निराधार कुटुंबांना धान्य किट, जीवनावश्यक वस्तूंचे वाटप करण्यात आले. तसेच पूरग्रस्त परिस्थितीतही मदतीचा हात पुढे करत नागरिकांना आवश्यक साहित्य उपलब्ध करून देण्यात आले.
डॉल्बीमुक्त कार्याचा प्रशासनाकडून गौरव
“वसुधैव कुटुंबकम्” या ब्रीदवाक्याने प्रेरित होऊन वर्षभर विविध भारतीय सण-उत्सव सर्व समाजघटकांना एकत्र आणत, एकजूट, बंधुता व सामाजिक सलोखा जपण्याचे कार्य ज्ञानेश्वरी देवकर यांच्याकडून सुरू आहे. सोलापूर शहरात डॉल्बीमुक्त गणेशोत्सव साजरा करून सामाजिक भान जपणारा आदर्श निर्माण केला. या उपक्रमाची दखल घेत महाराष्ट्र पोलीस प्रशासनाकडून त्यांचा विशेष गौरव करण्यात आला.
