बार्शी – तालुक्यातील आळजापूर येथील सिमरन हजीज शेख (पटेल) हिने जिद्द, चिकाटी आणि अथक परिश्रमाच्या जोरावर धाराशिव जिल्हा पोलीस दलात कॉन्स्टेबलपदी निवड मिळवत आपल्या गावाचे आणि कुटुंबाचे नाव उज्ज्वल केले आहे. अवघ्या २० व्या वर्षी मिळवलेल्या या यशामुळे आळजापूरसह परिसरात तिचे कौतुक होत आहे.
सिमरन हिने आपले प्राथमिक शिक्षण जिल्हा परिषद शाळा, आळजापूर येथे पूर्ण केले, तर माध्यमिक शिक्षण गौडगाव येथील मल्टी पर्पज आदर्श न्यू इंग्लिश स्कूलमध्ये घेतले. पोलीस भरतीची तयारी करण्यासाठी ती भूम येथील थ्री एस ॲकडमीमध्ये ७ फेब्रुवारी २०२४ पासून नियमित प्रशिक्षण घेत होती.
पहिल्या अपयशानंतरही हार मानली नाही
पोलीस भरतीच्या पहिल्या प्रयत्नात अपयश आले असतानाही सिमरन खचली नाही. उलट अधिक जोमाने आणि नियोजनबद्ध पद्धतीने तिने अभ्यास व शारीरिक सराव सुरु ठेवला. दुसऱ्या प्रयत्नात तिने लेखी आणि शारीरिक चाचण्यांमध्ये उल्लेखनीय कामगिरी करत यश संपादन केले. ग्रामीण भागातून येऊन कठीण स्पर्धा परीक्षेत यश मिळवणे ही सोपी बाब नसताना सिमरनने आपल्या कष्टाच्या जोरावर हे यश संपादन केले आहे.
सिमरन म्हणाली की, पोलीस भरतीच्या पहिल्या प्रयत्नात अपयश आले, पण मी खचले नाही. सातत्य, अभ्यास आणि चिकाटीच्या जोरावर प्रामाणिकपणे प्रयत्न करत राहिले आणि दुसऱ्या प्रयत्नात यश मिळाले.
