सोलापूर – हॉटेलमध्ये चहा पीत असताना अचानक चक्कर येऊन खाली पडल्याने एका 68 वर्षीय वृद्ध इसमाचा मृत्यू झाल्याची घटना नई जिंदगी येथील हॉटेल मध्ये आज मंगळवारी सकाळी साडेआठ वाजता घडली.
आप्पासाहेब मल्लप्पा तेरदाळे ( वय 68 वर्ष , रा .शिवगंगा नगर भाग 3 , नई जिंदगी , सोलापूर ) असे त्या मयत व्यक्तीचे नाव आहे . ते आज मंगळवारी सकाळी अमन चौकातील अमन हॉटेलमध्ये चहा पीत होते . अचानक चक्कर येऊन ते खाली कोसळले व बेशुद्ध होऊन पडले. दरम्यान मुलगा अजित याने त्यांना उपचाराकरिता येथील शासकीय रुग्णालयात दुपारी बारा वाजता दाखल केले असता उपचारादरम्यान त्यांचा दुपारी तीन वाजता मृत्यू झाला.
संगमेश्वर नगर भागात वीट भट्टी मजुराची गळफासाने आत्महत्या
सोलापूर – अज्ञात कारणावरून वीट भट्टीवरील एका पस्तीस वर्षीय मजुराने घरात लाकडीवाशाला दोरीच्या साह्याने गळफास घेऊन आत्महत्या केल्याची घटना एमआयडीसी येथील संगमेश्वर नगर मागे आज मंगळवारी सकाळी सहा वाजता उघडकीस आली .
कल्याणी परमेश्वर गेजगे ( वय 35 वर्ष ,रा हेबळी , ता.आळंद , जी गुलबर्गा ,सध्या संगमेश्वर नगर मागे , सोलापूर ) असे मयत मजुराचे नाव आहे . तो वरील ठिकाणी चांद नदाफ यांच्या वीटभट्टीवर कामास होता . आज मंगळवारी सकाळी सहा वाजता त्याच्या घरात त्याने गळफास घेतला असल्याचे उघडकीस आले . ही खबर एमआयडीसी पोलिसांना समजली असता हवालदार घोडके यांनी घटनास्थळी पोहचून सदरचा मृतदेह इतरांच्या साह्याने खाली उतरून येथील शासकीय रुग्णालयात शवविच्छेदनासाठी सकाळी आठ वाजता दाखल केला .
घरगुती भांडणात झुरळ मारण्याचे औषध पिलेल्या जुळे सोलापूर येथील इसमाचा अखेर मृत्यू
सोलापूर – घरगुती भांडणाच्या कारणावरून झुरळ मारण्याचे औषध पिलेल्या जुळे सोलापूर येथील एका इसमाचा उपचारादरम्यान येथील शासकीय रुग्णालयात आज मंगळवारी पहाटे चार वाजता मृत्यू झाला.
निलेश अशोक शिंदे ( वय 43 वर्ष , 64, हेरिटेज , जुळे सोलापूर ) असे त्या मयत इसमाचे नाव आहे . 14 मे रोजी रात्री नऊ वाजता राहत्या घराजवळ घरगुती भांडणाच्या कारणावरून त्यांनी झुरळ मारण्याचे औषध पिले होते . यात चक्कर येऊन खाली पडल्याने त्यांना चेहऱ्यास जखम व सर्व अंगाला मुका मार लागला होता . त्यामुळे त्यांना सोलापूरच्या जिल्हा रुग्णालयात प्रथम उपचार करून येथील शासकीय रुग्णालयात दाखल करण्यात आले असता त्यांचा उपचारादरम्यान आज मंगळवारी पहाटे चार वाजता मृत्यू झाला .