सोलापूर – दक्षिण सोलापूर पंचायत समितीच्या उपसभापती वर्षा सोमनाथ पटणे (उर्फ वर्षा शिवाजी कोनाळे) यांच्या जात प्रमाणपत्रासंदर्भात महत्त्वपूर्ण घडामोड समोर आल्याने राजकीय आणि प्रशासकीय वर्तुळात चर्चेला उधाण आले आहे. धाराशिव जिल्हा जात प्रमाणपत्र पडताळणी समितीने त्यांच्या ओबीसी प्रवर्गातील जात प्रमाणपत्राची पडताळणी करत ते अवैध असल्याचा निष्कर्ष नोंदवल्याची माहिती पुढे आली असून, संबंधित प्रमाणपत्र रद्द करून जप्त करण्याबाबत कारवाईचे निर्देश दिल्याची चर्चा सुरू आहे.
प्राप्त माहितीनुसार, होटगी स्टेशन परिसरातील सामाजिक कार्यकर्ते मिलिंद मुळे यांनी या संदर्भात तक्रार दाखल केली होती. या तक्रारीनंतर जात प्रमाणपत्र पडताळणी समितीने प्रकरणाची सखोल चौकशी हाती घेतली. निवडणूक अर्जासोबत वर्षा शिवाजी कोनाळे यांनी राज्य शासनाच्या इतर मागासवर्गीय (ओबीसी) यादीतील अनुक्रमांक १९० वरील ‘वाणी’ जातीचे प्रमाणपत्र सादर केले होते. संबंधित प्रमाणपत्राची सत्यता तपासण्यासाठी समितीने विविध शासकीय अभिलेख, नोंदी आणि कागदपत्रांची पडताळणी केली.
या प्रकरणात समितीने दोन वेळा सुनावणी निश्चित केल्याचे समजते. मात्र, दोन्ही वेळा संबंधितांकडून उपस्थिती राहिली नसल्याची नोंद समितीसमोर असल्याचे सांगितले जात आहे. त्यामुळे उपलब्ध पुरावे आणि शासकीय नोंदींच्या आधारे समितीने पुढील कार्यवाही सुरू ठेवली. तपासादरम्यान प्रमाणपत्रावरील डिजिटल स्वाक्षरी, कार्यालयीन शिक्का आणि इतर तांत्रिक बाबींची बारकाईने छाननी करण्यात आली. यावेळी संबंधित उपविभागीय अधिकाऱ्यांनी हे प्रमाणपत्र त्यांच्या कार्यालयातून निर्गमित झाले नसल्याचे लेखी स्वरूपात कळविल्याची माहिती समोर आली आहे. तसेच प्रमाणपत्रावरील बारकोडची पडताळणी केल्यानंतर त्यासंबंधित माहिती उपलब्ध होत नसल्याचेही निदर्शनास आल्याचे सूत्रांनी सांगितले.
दरम्यान, बोरामणी पंचायत समिती गणातून झालेल्या निवडणुकीत वर्षा पटणे यांनी २ हजार १४३ मतांच्या फरकाने विजय मिळवला होता. त्यांना ६ हजार ३०७ मते मिळाली होती, तर प्रतिस्पर्धी उमेदवारांना ४ हजार १६४ मते मिळाली होती. या विजयानंतर त्यांची दक्षिण सोलापूर पंचायत समितीच्या उपसभापतीपदी निवड झाली होती. आता जात प्रमाणपत्र पडताळणी समितीच्या निर्णयानंतर त्यांच्या पदावर, सदस्यत्वावर तसेच पुढील प्रशासकीय प्रक्रियेवर काय परिणाम होणार, याबाबत उत्सुकता निर्माण झाली आहे. या प्रकरणातील अधिकृत आदेश आणि संबंधित यंत्रणांकडून होणाऱ्या पुढील कारवाईकडे राजकीय वर्तुळासह सर्वसामान्यांचे लक्ष लागले आहे.
