सोलापूर – जिल्हा परिषदेच्या स्थायी समितीची महत्त्वपूर्ण सभा शुक्रवार, दि. ५ जून २०२६ रोजी दुपारी २ वाजता जिल्हा परिषद मुख्यालयातील शिवरत्न सभागृहात आयोजित करण्यात आली आहे. स्थायी समितीचे अध्यक्ष तथा सभापती दिपक अरुण वैद्य यांच्या अध्यक्षतेखाली ही सभा होणार असून जिल्हा परिषदेच्या विविध विभागांच्या कामकाजाचा आढावा यावेळी घेण्यात येणार आहे.
स्थायी समितीच्या सदस्यांना सभेस उपस्थित राहण्याचे आवाहन करण्यात आले असून सर्व खातेप्रमुख व संबंधित अधिकाऱ्यांनाही आवश्यक कागदपत्रांसह उपस्थित राहण्याच्या सूचना देण्यात आल्या आहेत. तसेच प्रत्येक विभागाने आपल्या अखत्यारितील विकासकामांची संक्षिप्त टिपणी सभेपूर्वी सादर करण्याचे निर्देश देण्यात आले आहेत.
सभेच्या कामकाजामध्ये दिनांक ८ मे २०२६ रोजी झालेल्या स्थायी समिती सभेचे कार्यवृत्त वाचून कायम करणे, शासनाकडून प्राप्त महत्त्वपूर्ण शासन निर्णय व परिपत्रकांची नोंद घेणे तसेच विविध विभागांकडील विकासकामांचा सविस्तर आढावा घेणे या प्रमुख विषयांचा समावेश आहे.
याशिवाय जिल्हा परिषद व पंचायत समित्यांच्या जमा-खर्च पत्रकांचे अवलोकन करून त्यास मंजुरी देण्याबाबत विचारविनिमय होणार आहे. जिल्हा ग्रामविकास निधीच्या खर्च व उपलब्धतेबाबत माहिती घेऊन आवश्यक मंजुरी देण्याचाही विषय सभेपुढे ठेवण्यात आला आहे. विविध विषय समित्यांच्या मे २०२६ महिन्यात झालेल्या सभांच्या कार्यवृत्तांची नोंद घेण्याचे कामही यावेळी करण्यात येणार आहे.
स्थायी समितीच्या सभेत जिल्हा परिषदेच्या विकास योजनांची अंमलबजावणी, आर्थिक स्थिती आणि विविध विभागांच्या प्रगतीचा आढावा घेतला जाणार असल्याने या सभेकडे जिल्हा परिषद प्रशासनासह लोकप्रतिनिधींचे लक्ष लागले आहे. सभापतींच्या परवानगीने आयत्या वेळचे विषयही चर्चेसाठी घेण्यात येणार असल्याची माहिती प्रशासनाकडून देण्यात आली आहे.
