सोलापूर : महानगरपालिकेच्या विविध डिजिटल प्रकल्पांची वेळेत व गुणवत्तापूर्ण अंमलबजावणी करण्यासाठी तसेच आधुनिक तंत्रज्ञानाचा प्रभावी वापर वाढविण्यासाठी सोलापूर महानगरपालिकेने महत्त्वपूर्ण पाऊल उचलले आहे. सोलापूर महानगरपालिकेच्या डिजिटल परिवर्तनासाठी व विविध तांत्रिक प्रकल्पांची वेळेत पूर्तता करण्यासाठी आयटी क्षेत्रातील तज्ज्ञांशी विनामूल्य तांत्रिक सहकार्याचा करार करण्यात आला.
महापौर विनायक कोंड्याल यांच्या अध्यक्षतेखाली झालेल्या बैठकीत आयटी क्षेत्रातील तज्ज्ञांच्या विनामूल्य तांत्रिक सहकार्याचा करार करण्यात आला. क्रांतीज्योती सावित्रीबाई फुले सभागृहात झालेल्या या बैठकीस स्थायी समिती सभापती रंजीता चाकोते, आयुक्त डॉ. सचिन ओम्बासे, उपायुक्त आशिष लोकरे, उपायुक्त सोनाली यादव, सहाय्यक आयुक्त शशिकांत भोसले, सहाय्यक आयुक्त गिरीश पंडित, संगणक प्रोग्रामर नागनाथ पडमगोंडा, सहाय्यक प्रोग्रामर मतीन सय्यद यांच्यासह संबंधित अधिकारी उपस्थित होते.यावेळी अॅप्रेली (Apprely) कंपनीचे संचालक साकेत मोकाटे व प्रसाद कंदलगांवकर यांच्यासह गिरीश येलका, ओंकार व्हटकर, उमाकांत कुलकर्णी, निरज देवस्थळी, प्रथमेश दुधणीकर, रोहन देशमाने आणि अक्षय बाचुवार यांनी महानगरपालिकेच्या डिजिटल परिवर्तनासाठी सहकार्य करण्याची भूमिका स्पष्ट केली.
ॲप रिलाय टेक्नॉलॉजी या कंपनीचे हा करार केला आहे. बैठकीत महापालिकेच्या विद्यमान प्रणालींचे आधुनिकीकरण, जुन्या सॉफ्टवेअर प्रणालींचे नवीन तंत्रज्ञानावर स्थलांतर, ईआरपी, क्लाऊड कॉम्प्युटिंग, कृत्रिम बुद्धिमत्ता (AI), ऑटोमेशन, डेटाबेस सुरक्षा, प्रकल्प नियोजन आणि जोखीम व्यवस्थापन यासंदर्भात सविस्तर चर्चा करण्यात आली. तसेच अॅजाईल व स्क्रम पद्धतींचा वापर, गुणवत्ता तपासणी, सिस्टीम इंटिग्रेशन, एपीआय सहाय्य आणि कर्मचाऱ्यांसाठी तांत्रिक प्रशिक्षण यावरही भर देण्यात आला. या उपक्रमामुळे महानगरपालिकेच्या डिजिटल सेवांची गुणवत्ता वाढण्यास, प्रकल्प वेळेत पूर्ण होण्यास आणि कर्मचाऱ्यांचे तांत्रिक कौशल्य विकसित होण्यास मदत होणार आहे. विशेष म्हणजे हे सर्व तांत्रिक मार्गदर्शन आणि सहकार्य कोणत्याही अतिरिक्त आर्थिक भाराशिवाय उपलब्ध होणार असल्याने महापालिकेला मोठा लाभ मिळणार आहे.
नागरिकांना अधिक दर्जेदार, पारदर्शक
सेवा उपलब्ध होणार : कोंड्याल
यावेळी महापौर विनायक कोंड्याल यांनी डिजिटल तंत्रज्ञानाचा वापर वाढवून नागरिकांना अधिक दर्जेदार व पारदर्शक सेवा उपलब्ध करून देण्याच्या दृष्टीने हा करार महत्त्वपूर्ण ठरणार असल्याचे सांगितले. आयुक्त डॉ. सचिन ओंबासे यांनीही या सहकार्यामुळे महानगरपालिकेच्या विविध डिजिटल प्रकल्पांना गती मिळेल, असा विश्वास व्यक्त केला.
विनामूल्य सहकार्य मिळाल्याने 6 कोटींची बचत
सोलापूर महापालिकेत ही एआय बेस्ड अत्याधुनिक प्रणाली असणार आहे. तक्रार निवारणापासून या प्रणालीस सुरुवात करण्यात येणार आहे. संबंधित कंपनीने ही प्रणाली मोफत दिली आहे. त्यामुळे सिस्टीम गतिमान होणार आहे. महापालिकेतील दहा जणांची ही टीम आहे. येत्या दीड वर्षात टप्प्याटप्प्याने विविध विभागात ही प्रणाली कार्यान्वित करण्यात येणार आहे. पेपरलेस काम होणार आहे. दर महिन्याला अपग्रेड केले जाणार आहे. सद्यस्थितीत तक्रार निवारण तत्काळ करण्यास याचा फायदा होईल. यापूर्वी एका संस्थेने या प्रणालीसाठी सहा कोटी रुपये सांगितले होते मात्र या नव्या कंपनीने ही प्रणाली मोफत दिली आहे.
