सोलापूर : महाराष्ट्र अर्बन वॉटर सप्लाय, सॅनिटेशन अँड रियूज प्रोग्रामअंतर्गत सोलापूर महानगरपालिकेत आलेल्या जागतिक बँक समूहाच्या जमीन विषयक तज्ज्ञांच्या शिष्टमंडळाचा दोन दिवसीय अभ्यासदौरा मंगळवारी सायंकाळी साडेपाचच्या सुमारास पूर्ण झाला. दुसऱ्या दिवशी पथकाने नगररचना, शहर विकास आराखडा, बांधकाम परवाना, मिळकतकर तसेच भूमी अभिलेख विभागाची सविस्तर माहिती घेतली.
जागतिक बँकेचे जमीन विषयक जागतिक प्रमुख मिका तोहोंनेन, माहिती व दळणवळण तंत्रज्ञान तज्ज्ञ अलेक्झांडर सोलोव्होव्ह तसेच पाणीपुरवठा व संस्थात्मक व्यवस्थापन तज्ज्ञ जे. व्ही. आर. मूर्ती या शिष्टमंडळात सहभागी होते. महापालिकेच्या जमीन व्यवस्थापन आणि नागरी सेवा प्रणालीतील कार्यपद्धती, चांगल्या बाबी, उणिवा तसेच आवश्यक सुधारणांचा अभ्यास या दौऱ्यात करण्यात आला.पहिल्या दिवशी पथकाने जमीन व्यवस्थापन, मालमत्ता नोंदी, नगररचना आणि डिजिटल प्रणालीसंदर्भात विविध विभागांकडून माहिती घेतली होती.
मंगळवारी दुसऱ्या दिवशी नगररचना विभागात शहराच्या विकास आराखड्याची सद्यस्थिती, आराखड्याअंतर्गत सर्वेअरकडून करण्यात येणारी कामे तसेच नगररचना विभागाची कार्यपद्धती याची माहिती घेण्यात आली. नगररचना सहसंचालक समीर शितोळे यांनी पथकाला आवश्यक माहिती दिली.युडीसीपीआरअंतर्गत बांधकाम परवान्यांची प्रक्रिया कशी राबविली जाते, याचीही पथकाने माहिती घेतली. त्याचबरोबर जीआयएस प्रणाली, जमीन व मालमत्ता नोंदी आणि बांधकाम परवान्यांशी संबंधित प्रक्रियेचा आढावा घेण्यात आला.
मिळकत कर विभागाची माहिती घेताना २००५ नंतर मिळकतकरात वाढ का झाली नाही?, असा प्रश्न पथकाने उपस्थित केला. कर आकारणीची पद्धत, मालमत्ता कराची वसुली आणि संबंधित नोंदी याबाबतही अधिकाऱ्यांकडून माहिती घेण्यात आली.
दरम्यान, राज्य शासनाच्या भूमी अभिलेख विभागाची माहिती देण्यासाठी या विभागाचे वरिष्ठ अधिकारी पवार महापालिकेत उपस्थित होते. त्यांनी जमीन अभिलेख, नोंदी आणि संबंधित कार्यपद्धतीची माहिती पथकाला दिली.
महापालिका आयुक्त डॉ. सचिन ओम्बासे यांच्या आदेशानुसार अतिरिक्त आयुक्त वीणा पवार यांनी विविध विभागांमध्ये समन्वय साधला. आवश्यक ती माहिती देण्यात आली.
शिष्टमंडळाकडून जागतिक बँकेकडे
अहवाल सादर केला जाणार : वीणा पवार
दोन दिवसांच्या पाहणीनंतर जागतिक बँकेचे पथक सोलापूर महापालिकेच्या जमीन व्यवस्थापन व नागरी सेवा प्रणालीचा सविस्तर अभ्यास करून भविष्यातील सुधारणा आणि आधुनिकीकरणासाठी आवश्यक शिफारसी करणार आहे. महापालिकेच्या कामकाजातील चांगल्या पद्धतींसह उणिवा आणि सुधारणांच्या बाबींचा अहवाल जागतिक बँकेकडे सादर केला जाणार आहे. दरम्यान, येत्या २३ ऑक्टोबर रोजी जागतिक बँकेचे संचालक पुणे येथे येणार आहेत. त्या बैठकीला सोलापूर महापालिका आयुक्त डॉ. सचिन ओम्बासे यांना निमंत्रित करण्यात आले असल्याचे अतिरिक्त आयुक्त वीणा पवार यांनी सांगितले.
