सोलापूर – दिवाळी सणाचा उत्साह आणि भाऊबीजेच्या निमित्ताने जिल्हा परिषदेतील महिला सदस्यांची परगावी असलेली उपस्थिती लक्षात घेऊन गुरुवार, १२ नोव्हेंबर रोजी आयोजित करण्यात आलेली सोलापूर जिल्हा परिषदेची सर्वसाधारण सभा स्थगित करण्यात आली आहे. महिला सदस्यांनी केलेल्या विनंतीला जिल्हा परिषद अध्यक्ष दीपक वैद्य यांनी सकारात्मक प्रतिसाद दिला असून, आता ही सभा पुढील आठवड्यात आयोजित करण्यात येणार आहे. त्यामुळे जिल्ह्यातील विविध विकासकामांशी संबंधित महत्त्वपूर्ण विषयांवरील निर्णयांसाठी आणखी काही दिवस प्रतीक्षा करावी लागणार आहे.
जिल्हा परिषदेची गुरुवारी होणारी सर्वसाधारण सभा प्रशासकीय आणि विकासात्मक दृष्टीने महत्त्वाची मानली जात होती. या सभेत जिल्ह्यातील शिक्षण व्यवस्था, आरोग्य सुविधा, रस्ते विकास, धार्मिक स्थळांचे सुशोभीकरण तसेच वित्त आयोगाच्या आराखड्याबाबत चर्चा होऊन महत्त्वाचे निर्णय अपेक्षित होते. त्यामुळे या सभेकडे जिल्ह्यातील विविध विभागांचे तसेच लोकप्रतिनिधींचे लक्ष लागले होते.
मात्र, दिवाळी सणानंतर गुरुवारी भाऊबीजेचा सण असल्याने जिल्हा परिषदेतील अनेक महिला सदस्य आपल्या गावी आणि परगावी गेल्या आहेत. सोलापूर जिल्हा परिषदेत एकूण सदस्यांपैकी ५० टक्के महिला सदस्य आहेत. त्यामुळे महिला सदस्यांची उपस्थिती महत्त्वाची असल्याने सभा पुढे ढकलण्याची मागणी करण्यात आली.महिला सदस्यांच्या विनंतीचा विचार करून अध्यक्ष दीपक वैद्य यांनी गुरुवारची सभा स्थगित करण्याचा निर्णय घेतला. पुढील आठवड्यात सभेचे आयोजन करण्यात येणार असल्याचे त्यांनी स्पष्ट केले.
दरम्यान, पुढील आठवड्यात होणाऱ्या सभेत प्रलंबित विकासकामे, ग्रामीण भागातील मूलभूत सुविधा आणि विविध योजनांच्या अंमलबजावणीवर कोणती चर्चा होते, याकडे आता जिल्हावासीयांचे लक्ष लागले आहे.
