मंगळवेढा – मागील काही दिवसापुर्वी झालेल्या भांडणाच्या कारणावरुन मोटर सायकलवरुन घराकडे निघालेल्या एका गवंडी मजूरास तलवारीने,दगडाने मारुन गंभीर जखमी करुन बोट फ्रॅक्चर केल्याप्रकरणी गोट्या नाईकवाडी,सुशांत पाटील,सुमित पडवळे,अजय पडवळे,विनायक काळे, समर्थ हजारे, यश जगदाळे,महेश मोटे, अनिकेत पडवळे, सुशांत हजारे (सर्व रा.मंगळवेढा), गणेश वायकुळे (रा.पंढरपूर) आदी 11 जणाविरुध्द पोलीसात गुन्हा दाखल झाला आहे.
पोलीस सुत्रांनी दिलेली माहिती अशी,यातील जखमी फिर्यादी साहिल अनिल शिंदे या व्यवसायाने गवंडी असून दि.31 मे रोजी रात्री 11 वाजता एम.एच.13 डी.ए.1122 या मोटर सायकलवरुन बसस्थानक येथून शनिवार पेठेतील घराकडे निघाला होता. दरम्यान नवरंग चौकात फिर्यादी आल्यावर वरील आरोपींनी मोटर सायकल अडवून तू यश हेगडे याचेसोबत मागील काही दिवसापुर्वी भांडणे का केली? अशी विचारणा करीत शिवीगाळी करुन लाथाबुक्क्यांनी तसेच कोयत्याने, तलवारीने,रॉडने डोकीत,मध्यभागी,उजव्या कानाजवळ,हनुवटीला मारुन गंभीर जखमी केले. तसेच उजव्या हाताच्या अंगठ्याजवळ मारल्याने बोट फ्रॅक्चर झाले असल्याचे दिलेल्या फिर्यादीत म्हटले आहे. याचा अधिक तपास पोलीस करीत आहेत.
