सोलापूर : रिपब्लिकन चळवळीतील निस्वार्थ कार्यकर्ते, माजी नगरसेवक, शिवाजी विद्यापीठाचे सिनेट सदस्य, सोलापूर महानगरपालिका कर्मचारी संघटनेचे कार्याध्यक्ष तसेच विविध सामाजिक, शैक्षणिक आणि कायदेविषयक क्षेत्रांत उल्लेखनीय योगदान देणारे ॲड. पी. आर. क्षीरसागर यांच्या जीवनकार्याचा प्रेरणादायी प्रवास उलगडणाऱ्या ‘प्रवासी वादळवाटेवरचा’ या चरित्रग्रंथाचा प्रकाशन सोहळा रविवारी दि. २६ जुलै रोजी सायंकाळी ५.३० वाजता डॉ. निर्मलकुमार फडकुले सभागृह, सिद्धेश्वर मंदिराजवळ, सोलापूर येथे होणार आहे.
ज्येष्ठ आंबेडकरी विचारवंत लेखक दत्ता गायकवाड यांनी या चरित्रग्रंथाचे लेखन केले असून, ॲड. पी. आर. क्षीरसागर यांच्या सामाजिक, राजकीय आणि आंबेडकरी चळवळीतील योगदानाचा वेध या पुस्तकातून घेण्यात आला आहे. पारमिता फाऊंडेशन, सोलापूरच्या वतीने आयोजित या कार्यक्रमात ज्येष्ठ आंबेडकरी विचारवंत व माजी आमदार ॲड. जयदेव गायकवाड यांच्या हस्ते पुस्तकाचे प्रकाशन होणार आहे. कार्यक्रमाच्या अध्यक्षस्थानी ज्येष्ठ पत्रकार अरुण खोरे राहणार आहेत. ज्येष्ठ आंबेडकरी विचारवंत प्रा. एम. आर. कांबळे आणि रिपब्लिकन एम्प्लॉईज फेडरेशनचे राज्य संघटक युवराज सावंत यांची प्रमुख उपस्थिती लाभणार आहे.
या कार्यक्रमाचे सूत्रसंचालन डॉ. अंजना गायकवाड करणार असून, नागरिकांनी या प्रकाशन सोहळ्यास उपस्थित राहण्याचे आवाहन सुधीर चंदनशिवे, सुर्यमणी गायकवाड, सुजित हावळे यांनी केले आहे.
