बदनापूर / जालना – बदनापूर तालुक्यातील निकळज शिवारात तब्बल एका महिन्यापासून बेपत्ता असलेल्या तरुणाचा थरारक खून उघडकीस आला आहे. प्रेमसंबंधाच्या वादातून भावानेच आपल्या मोठ्या भावाचा खून करून, भावजयीच्या मदतीने प्रेताचा पुरावा नष्ट करण्याचा प्रयत्न केल्याचे धक्कादायक वास्तव समोर आले आहे.
मिळालेल्या माहितीनुसार, दिनांक 12 नोव्हेंबर 2025 रोजी सकाळी सुमारास निकळज शिवारातील वाला–सोमठाणा तलावात प्लास्टिकच्या मुरघासाच्या बोथमध्ये एक अनोळखी प्रेत स्थानिक नागरिकांच्या नजरेस पडले. घटनेची माहिती मिळताच पोलिस निरीक्षक श्री. एम.टी. सुरवसे व त्यांचा पथक घटनास्थळी दाखल झाले. तलावातून प्रेत बाहेर काढून ओळख पटविली असता, मृतदेह हा परमेश्वर राम तायडे (वय 30, रा. सोमठाणा, ता. बदनापूर) यांचा असल्याचे निष्पन्न झाले.
प्राथमिक चौकशीतच हा मृत्यू नैसर्गिक नसून, अत्यंत योजनाबद्ध पद्धतीने केलेला खून असल्याचे स्पष्ट झाले. याप्रकरणी मयताचे वडील रामनाथ तायडे यांनी दिलेल्या तक्रारीवरून बदनापूर पोलीस ठाण्यात गुन्हा दाखल करण्यात आला. पोलिसांनी तपासाची चक्रे वेगाने फिरवत काही तासांतच आरोपींना ताब्यात घेतले.
चौकशीत धक्कादायक माहिती समोर आली की, मयताचा लहान भाऊ ज्ञानेश्वर राम तायडे (वय 28) याचे आपल्या भावजई मनिषा परमेश्वर तायडे (वय 25) हिच्याशी अनैतिक संबंध होते. मयत परमेश्वर याला या संबंधांची माहिती मिळाल्याने तो दोघांना रोखत होता. त्यामुळे अडथळा दूर करण्याच्या हेतूने दोघांनी मिळून 15 ऑक्टोबर 2025 रोजी मध्यरात्री 1 वाजेच्या सुमारास कुर्हाडीने डोक्यावर व चेहऱ्यावर वार करून परमेश्वरचा खून केला.
खुनानंतर पुरावा नष्ट करण्यासाठी त्यांनी मृतदेह प्लास्टिकच्या मुरघासाच्या बोथमध्ये भरून दोरीने घट्ट बांधला आणि दगड बांधून वाला–सोमठाणा तलावात फेकून दिला.
या भीषण गुन्ह्यातील दोन्ही आरोपींना अटक करण्यात आली असून पुढील तपास पोलीस निरीक्षक एम.टी. सुरवसे हे करीत आहेत.
सदर कारवाई अजयकुमार बंसल (पोलीस अधीक्षक, जालना), आयुष नोपानी (अपर पोलीस अधीक्षक, जालना) आणि अनंत कुलकर्णी यांच्या मार्गदर्शनाखाली सपोनि अविनाश राठोड, पोउपनि संतोष कुकलारे, पोहेकॉ इस्माईल शेख, पोकों अब्दुल बारी, मपोकों प्रीती जाधव, पोकों गोपाळ बारवाल, चालक पोकों राम सानप यांच्या पथकाने ही कारवाई केली.
या घटनेने बदनापूर तालुक्यात खळबळ उडाली असून, प्रेमसंबंधाच्या वादातून उभा राहिलेला हा कौटुंबिक खून गावात चर्चेचा विषय ठरला आहे.
