सोलापूर : महानगरपालिकेच्या क्षयरोग विभागातील वैद्यकीय अधिकारी डॉ. अरुंधती हराळकर यांच्याकडून कर्मचाऱ्यांना सातत्याने मानसिक त्रास दिला जात असल्याचा गंभीर आरोप करत विविध कर्मचारी संघटनांनी त्यांच्या तात्काळ बदलीसह कठोर कारवाईची मागणी केली आहे.
आज दुपारी संबंधित प्रकरणात कर्मचारी ट्रीटमेंट सुपरवायझर सचिन मस्के यांना झालेल्या त्रासामुळे त्यांची प्रकृती बिघडून ते अधिकाऱ्यांच्या दालनातच कोसळल्याचा दावा संघटनांनी केला आहे. दरम्यान, त्यांच्यावर एका खाजगी रुग्णालयात उपचार सुरू होते. एनएचएम कर्मचारी संघटनेच्या अध्यक्षा विजया कांबळे यांनीही डॉ. हराळकर यांच्याविरोधात अनेक तक्रारी पूर्वीपासून करण्यात आल्या आहेत. डॉ. हराळकर यांच्याकडून कर्मचाऱ्यांना “नासके कांदे”, “हत्ती” आणि “बिनकामाचे” अशा अपमानास्पद शब्दांत हिणवले जात असल्याचा आरोप त्यांनी केला. सचिन मस्के यांना चक्कर आल्यानंतरही वैद्यकीय अधिकारी म्हणून आवश्यक मदत न करता त्यांची खिल्ली उडविण्यात आल्याचे त्यांनी सांगितले. या प्रकरणी तातडीने निर्णय न झाल्यास महानगरपालिकेतील सर्व आरोग्य कर्मचारी संघटना एकत्र येऊन रुग्णालये बंद ठेवण्याचा इशाराही कांबळे यांनी दिला.
कामगार नेते जनार्दन शिंदे यांनी सांगितले की, ट्रीटमेंट सुपरवायझर सचिन मस्के यांना गेल्या काही दिवसांपासून मानसिक तणाव दिला जात होता. या तणावातूनच त्यांना चक्कर येऊन ते पडले. मात्र, त्यावेळी डॉ. हराळकर यांनी त्यांची विचारपूस करण्याऐवजी “हे ढोंग करत आहेत” अशी टिप्पणी करून तेथून निघून गेल्याचा आरोप त्यांनी केला. अशा वागणुकीतून संवेदनशीलतेचा पूर्ण अभाव दिसून येत असल्याचा आरोप केला.
कामगार नेते बापूसाहेब सदाफुले यांनीही कर्मचाऱ्यांना अपमानास्पद वागणूक दिली जात असल्याचा आरोप केला. दोन वेळा बदलीचे आदेश होऊनही त्यांची अंमलबजावणी झाली नसल्याचा दावा करत, माझ्याकडे ट्रम्प कार्ड आहे असे संबंधित अधिकाऱ्यांकडून सांगितले जात असल्याचा गंभीर आरोप त्यांनी केला.
दरम्यान, या संदर्भात डॉ. अरुंधती हराळकर यांच्याशी संपर्क साधला असता त्यांनी आपली बाजू मांडली. संबंधितांनी केलेले आरोप खोटे आहेत. मी गेल्या अडीच वर्षापासून अधिकारी म्हणून हा विभाग नेटक्या पद्धतीने सांभाळत आहे. राष्ट्रीय कार्यक्रमांतर्गत कामाचा व्याप वाढला आहे. काम न करणाऱ्यांना हे रुचत नाही. मी कुणालाही अयोग्य, अपमानास्पद वागणूक दिली नाही. डॉक्टर या नात्याने माझ्यावर चांगले संस्कार आहेत, असे त्यांनी म्हटले आहे.
महापौरांनी दिले कारवाईचे आश्वासन
दरम्यान, कर्मचारी संघटनांनी महापौर विनायक कोंड्याल, सभागृह नेते नरेंद्र काळे, नगरसेविका रोहिणी तडवळकर, आरोग्य अधिकारी डॉ. राखी माने यांची भेट घेऊन या प्रकरणाची सखोल चौकशी करून डॉ. हराळकर यांच्यावर शिस्तभंगाची कारवाई करण्याची मागणी केली आहे. अन्यथा सर्व संघटना रस्त्यावर उतरून तीव्र आंदोलन छेडतील, असा इशारा देण्यात आला आहे. यावेळी महापौर कोंड्याल यांनी येत्या दहा दिवसात या संदर्भात नियमानुसार कार्यवाही केली जाईल, असे आश्वासन दिले.
