पंढरपुर – राज्याचे सार्वजनिक आरोग्य मंत्री प्रकाश आबिटकर यांच्या मार्गदर्शनाखाली कार्तिकी यात्रा कालावधीमध्ये जिल्हाधिकारी कुमार आशीर्वाद यांच्या संकल्पनेतुन व उपजिल्हा रुग्णालयाच्या माध्यमातुन शहराच्या विविध भागात स्थापित केलेल्या सहा आयसीयु सेंटर आणि उपजिल्हा रुग्णालय येथे सुमारे ३५ हजारहुन अधिक रुग्णांवर औषधोपचार करण्यात आले असल्याची माहिती उपजिल्हा रुग्णालयाचे वैद्यकिय अधिक्षक डॉ.दिपक धोत्रे यांनी दिली.
कार्तिकी यात्रा दि. २६ ऑक्टोबर ते ५ नोव्हेंबर या कालावधीमध्ये राज्याचे आरोग्य विभागाचे संचालक डॉ.नितीन अंबाडेकर, पुणे विभागाचे संचालक डॉ. विजय कंदेवाड, पुणे परिमंडळाचे उपसंचालक डॉ.भगवान पवार, जिल्हा शल्यचिकित्सक डॉ.वर्षा डोईफोडे, निवासी वैद्यकिय अधिकारी डॉ. श्रीकांत कुलकर्णी, अतिरिक्त जिल्हा शल्यचिकित्सक डॉ. चंद्रकांत क्षिरसागर यांच्या मार्गदर्शनाखाली ६५ एकर, वाळवंट-१, वाळवंट-२, पत्रा शेड, दर्शन मंडप, या शहरातील गर्दीच्या ५ ठिकाणी व उपजिल्हा रुग्णालय पंढरपुर येथे असे एकुण ६ आयसीयु सेंटर स्थापन करण्यात आले होते.वारी कालावधीत स्थापित करण्यात आलेल्या आयसीयु सेंटर मध्ये १२७ गंभीर रुग्णांना उपचारासाठी दाखल केले. त्यांच्यावर यशस्वी उपचार करुन त्यांना डिस्चार्ज देण्यात आले.यामध्ये उपजिल्हा रुग्णालय येथील आयसीयु सेंटरमध्ये पुरुष ११, व स्त्री ५ अशा तब्बल १६ गंभीर रुग्णांना दाखल करुन त्यांच्यावर उपचार करण्यात आले. तसेच विविध इतर आजारांच्या ४२८ रुग्णांना उपचाराकरीता दाखल करुन त्यांच्यावर यशस्वी उपचार करण्यात आले.
या शिवाय रुग्णालयाच्या प्रत्येक विभागात पिण्याच्या शुध्द पाण्याची सोय उपलब्ध करुन देण्यात आलेली होती. रुग्णालयात आलेल्या रुग्ण व नातेवाईकांना परिपुर्ण व उत्कृष्ठ आरोग्य सेवा देण्याकरीता सर्व वैद्यकिय अधिकारी, सहा. अधिसेविका, परिसेविका अधिपरिचारीका, पॅरामेडीकल स्टाफ, व वर्ग ४ कर्मचारी यांनी अथक परिश्रम घेतले.
———————–
बुडालेल्या भाविकाचे वाचविले प्राण –
वाळवंट व नदी पात्रात तैनात असलेल्या आपत्ती व्यवस्थापन पथकाने नदीत बुडालेल्या कर्नाटक येथील रुद्राप्पा गोलार (वय ४५) या इसमास रेस्क्यु करुन बेशुध्द अवस्थेत उपजिल्हा रुग्णालय पंढरपुर येथे संदर्भित केले. नोडल अधिकारी यांना जिल्हा आपत्ती व्यवस्थापन अधिकारी शक्तीसागर ढोले यांनी कळविले. त्यानुसार उपजिल्हा रुग्णालय पंढरपुर येथील आयसीयु मध्ये बेशुध्द व श्वास बंद असलेल्य अवस्थेत तातडीने दाखल करुन घेतले. फिजीशीयन डॉ. संग्राम गायकवाड, डॉ. सीमा इंगोले यांनी योग्य उपचार सुरु केले व रुग्णास जीवदान दिले.
—————-
हार्ट ॲटॅकचे त्वरीत निदान –
पासष्ठ एकर येथील आयसीयु मध्ये विश्वंभर कारपुरे (वय ६०) रा. भुम या भाविकास हार्ट ॲटॅकचे निदान करण्यात आले व तातडीने आवश्यक उपचार करुन शासनाच्या स्टेमी प्रोजेक्ट अंतर्गत लाईफलाईन हॉस्पीटल येथे पुढील उपचाराकरीता पाठविण्यात आले. तसेच स्टेमी प्रोजेक्ट अंतर्गत हदयविकाराच्या इतर ७ रुग्णांवरती या रुग्णालयात मोफत उपचार चालु आहेत.
—————–
फिट्स व शुध्द हरपलेल्या रुग्णाचे वाचविले प्राण –
उपजिल्हा रुग्णालय पंढरपुर येथे शिवाजी शामराव निंबाळकर (वय ५०) मु.पो आमरवाडी जिल्हा कोल्हापुर या रुग्णास वाळवंटात अचानक फिट्स व शुध्द हरपणे अशी लक्षणे असल्याने व रुग्ण बेशुध्द अवस्थेत त्याला तात्काळ उपजिल्हा रुग्णालयात आवश्यक उपचार केल्यानंतर रुग्ण शुध्दीवर आला. तीन दिवसानंतर रुग्ण संपूर्णपणे बरा करुन रुग्णास घरी पाठविण्यात आले.
—————–
चार संर्पदंश झालेल्या रुग्णांवर उपचार –
यात्रा कालावधीत एक हजार ७८४ हुन अधिक रुग्णांच्या रक्त, लघवी इत्यादी तपासण्या करण्यात आल्या ४१९ रुग्णांचे एक्स रे, २५६ रुग्णांचे सी.टी स्कॅन करण्यात आले. तर २१४ रुग्णांचे ईसीजी करण्यात आले तसेच ४ सर्पदंश झालेल्या रुग्णांवर उपचार करण्यात आले अशी माहिती नोडल अधिकारी डॉ.प्रसन्न भातलवंडे यांनी दिली.
