बार्शी – बार्शी शहरातील राऊत चाळ परिसरातील बंद असलेल्या लोकमान्य मिलमध्ये पालाच्या शेडखाली सुरच असलेल्या जुगार अड्ड्यावर सोलापूर ग्रामीण पोलिसांनी छापा टाकून सातजणांना ताब्यात घेतले. या कारवाईत रोख रक्कम, मोबाईल फोन, जुगाराचे साहित्य आणि पाच मोटारसायकली असा एकूण २ लाख ७२ हजार ५२० रुपयांचा मुद्देमाल जप्त करण्यात आला.
पोलिसांनी दिलेल्या माहितीनुसार, मंगळवार दि. २५ ऑगस्ट २०२६ रोजी सोलापूर ग्रामीणचे पोलीस अधीक्षक यांच्या सूचनेनुसार परिमंडळ पोलीस उपअधीक्षक गणेश शिंदे यांच्या मार्गदर्शनाखाली ही कारवाई करण्यात आली. बार्शी शहरातील राऊत चाळ येथील सिल्व्हर ज्युबिली प्रशालेच्या बाजूस असलेल्या बंद लोकमान्य मिलमध्ये पालाच्या शेडखाली जुगार सुरु असल्याची गोपनीय माहिती सोलापूर पोलिसांना मिळाली होती.
या माहितीची खात्री करचन कारवाई करण्यासाठी जलद प्रतिसाद पथकातील अधिकारी व कर्मचारी तसेच बार्शी शहर पोलीस ठाण्याचे अधिकारी व कर्मचारी घटनास्थळी रवाना झाले. पोलिसांनी दोन पंचांना सोबत घेऊन नमूद ठिकाणी छापा टाकला. त्यावेळी काहीजण गोलाकार बसून पत्त्यांवर पैसे लावून ‘मन्ना’ नावाचा जुगार खेळताना आढळून आले.
पोलिसांनी जागीच सातजणांना ताब्यात घेतले. त्यांची नावे किरण भिमराव काकडे (४०), राहूल भगवान उंदरे (३७), सुरज बाळासाहेब जाधव (३३), अमजद शेरखान पठाण (४३), किशोर बापू वायकर (४५), आत्माराम मोहन चव्हाण (५५) आणि संकेश सुरेश बडेकर (२८) अशी असल्याचे पोलिसांनी सांगितले.
ताब्यात घेतलेल्या संशयितांच्या अंगझडतीत रोख रक्कम व विविध कंपन्यांचे मोबाईल फोन मिळून आले. तसेच घटनास्थळी पाच मोटारसायकली आणि ५२ पत्त्यांची पाने जप्त करण्यात आली. जप्त करण्यात आलेल्या मुद्देमालाची एकूण किंमत २ लाख ७२ हजार ५२० रुपये असल्याचे पोलिसांनी नमूद केले आहे.
या प्रकरणी पोलीस सदाशिव विष्णू चिपडे यांच्या फिर्यादीवरुन संबंधित सातजणांविरुद्ध महाराष्ट्र जुगार प्रतिबंधक कायदा कलम १२(अ) अन्वये कायदेशीर कारवाई करण्यात आली आहे. पुढील तपास पोलीस उपनिरीक्षक अभयकुमार माकणे करीत आहेत.
दरम्यान, बार्शीतील जुगार अड्ड्यावर सोलापूर ग्रामीण पोलिसांच्या विशेष पथकाने केलेल्या कारवाईनंतर बार्शी शहर पोलिसांच्या कार्यक्षमतेवर पुन्हा एकदा नागरिकांकडून प्रश्नचिन्ह उपस्थित केले जात आहे. बार्शी शहर व परिसरातील अवैध व्यवसायांवर सोलापूर ग्रामीण पोलिसांच्या विशेष पथकाकडून सातत्याने कारवाया होत आहेत. विशेष पथकाला या अवैध धंद्यांची गोपनीय माहिती मिळते; मात्र बार्शी शहर पोलिसांच्या हद्दीत सुरु असलेल्या अवैध व्यवसायांची माहिती स्थानिक पोलिसांना मिळत नाही का? असा सवाल नागरिकांकडून उपस्थित केला जात आहे. विशेष पथकाकडून वारंवार कारवाया होत असताना स्थानिक पोलिसांकडून या अवैध धंद्यांकडे डोळेझाक केली जाते का? याबाबत आता नागरिकांमध्ये चर्चा सुरु झाली आहे.
