पंढरपूर – येथील भव्य ‘नामसंकीर्तन सभागृहाचे’ (नाट्यगृह) ९० टक्के काम पूर्ण झाले असून उर्वरित १० टक्के काम पूर्ण करण्यासाठी २२ कोटी रुपयांचा निधी मंजूर करावा, अशी मागणी माजी आमदार प्रशांत परिचारक यांनी मुख्यमंत्री देवेंद्र फडणवीस यांच्याकडे केली आहे. या मागणीवर मुख्यमंत्र्यांनी अत्यंत सकारात्मकता दर्शवली असून हा निधी लवकरच उपलब्ध करून देण्याचे आश्वासन दिले आहे. दरम्यान हगा निधी मंजूर होताच उर्वरित काम पूर्ण करून येत्या आषाढी वारीमध्ये या नामसंकिर्तन सभागृहाचे मुख्यमंत्र्यांच्या हस्ते उद्घाटन करण्यात येणार असल्याचे देखील प्रशांत परिचारक यांनी सांगितले.
२०१८ मध्ये मंजूर झालेल्या या नामसंकीर्तन सभागृह प्रकल्पाचे ९०% काम पूर्ण झाले आहे. मात्र उर्वरित कामासाठी निधीची आवश्यकता असल्याने परिचारक यांनी मुंबई येथे मुख्यमंत्री महोदयांची भेट घेतली. गेल्या २-३ वर्षांपासून नगरविकास विभागाकडे हा विषय प्रलंबित होता. या प्रकल्पाचे महत्त्व लक्षात घेऊन, ‘वैशिष्ट्यपूर्ण योजनेअंतर्गत’ हा २२ कोटींचा निधी मार्च अखेरपर्यंत मंजूर करावा, अशी आग्रही मागणी यावेळी करण्यात आली.
मुख्यमंत्र्यांनी या प्रकल्पाबाबत पूर्ण अनुकूलता दर्शवली असून, निधी देण्याबाबत संबंधित विभागाला निर्देश दिले आहेत. निधी मार्चपूर्वी उपलब्ध झाल्यास उर्वरित तिसऱ्या टप्यातील नामसंकीर्तन सभागृहाचे अंतर्गत रस्ते, भुखंड विकास अंतर्गत रस्ते सुधारणा, फर्निचर व्यवस्था, विद्युत व्यवस्था, सिसिटीव्ही कॅमेरे, सौरऊर्जा कामे व रोहित्र स्थलांतरण इ.कामे करण्याची असून युद्धपातळीवर ती पूर्ण करण्यात येतील असेही परिचारक यांनी सांगितले.
———————
चौकट : ( पंढरपूरच्या सांस्कृतिक वैभवात भर )
“वारकरी संप्रदायाचे केंद्र असलेल्या पंढरपुरात हे भव्य सभागृह सांस्कृतिक उपक्रमांसाठी अत्यंत गरजेचे आहे. ९०% काम पूर्ण झाले असून, उर्वरित १०% काम केवळ निधीअभावी रखडले होते. मुख्यमंत्री महोदयांनी सकारात्मक प्रतिसाद दिल्यामुळे आता या वास्तूचे स्वप्न लवकरच साकार होईल आणि आषाढीला मुख्यमंत्र्यांच्या हस्ते याचे लोकार्पण करून ते पंढरपूरकरांच्या सेवेत दाखल होईल,” असा विश्वास प्रशांत परिचारक यांनी व्यक्त केला.
