सोलापूर – जिल्हा परिषदेतील कृषी व पशुसंवर्धन विभागाच्या वाटपावरून सुरू असलेल्या चर्चांना आता नवे वळण मिळाले आहे. या विभागाबाबत सुरुवातीपासूनच विविध स्तरांवर राजकीय घडामोडी सुरू असताना, जिल्हाध्यक्ष इंद्रजित (इंदाभाऊ) पवार यांनी रामप्पा सावकार यांना दिलेला शब्द अखेर पाळल्याची चर्चा जिल्हा परिषदेच्या राजकीय वर्तुळात रंगू लागली आहे.
कृषी व पशुसंवर्धन हा ग्रामीण विकासाच्या दृष्टीने महत्त्वाचा विभाग मानला जातो. त्यामुळे या विभागाच्या वाटपाकडे अनेक सदस्यांचे लक्ष लागले होते. विभाग वाटपाच्या प्रक्रियेदरम्यान सावकार यांना हा विभाग मिळावा, अशी अपेक्षा व्यक्त होत होती. त्यावेळी माध्यमांनी यासंदर्भात इंद्रजित पवार यांना प्रश्न विचारला असता, “रामप्पा सावकार यांना बोलू… शब्द दिला आहे,” असे सूचक उत्तर त्यांनी दिले होते.
मध्यंतरी प्रशासकीय प्रक्रियेमुळे आणि बदलत्या राजकीय घडामोडींमुळे हा विषय मागे पडल्याचे चित्र निर्माण झाले होते. त्यामुळे दिलेला शब्द प्रत्यक्षात उतरतो की नाही, याबाबतही विविध तर्क-वितर्क व्यक्त केले जात होते. मात्र, अलीकडे झालेल्या चर्चांनंतर परिस्थिती बदलल्याचे सांगितले जात आहे. मुख्यमंत्री स्तरावरील संवादानंतर विभाग वाटपाबाबत सकारात्मक हालचाली झाल्याची माहिती राजकीय सूत्रांकडून दिली जात आहे.
यामुळे “रामप्पा सावकार यांच्या विभागाला इंदाभाऊंचा शब्द अखेर खरा ठरला,” अशी चर्चा जिल्हा परिषदेच्या वर्तुळात सुरू झाली आहे. अधिकृत घोषणा अद्याप झालेली नसली, तरी या घडामोडींमुळे जिल्हा परिषदेतील राजकीय समीकरणांना नवे परिमाण मिळण्याची शक्यता व्यक्त होत आहे. आता अंतिम निर्णय आणि अधिकृत विभाग वाटपाकडे सर्वांचे लक्ष लागले आहे.
