मोहोळ – आंतर राष्ट्रीय युद्धजन्य परिस्थितीमुळे भारतावर कुठलाही परिणाम होणार नाही उलट याचा फायदा घेऊन भारतावर दबाव ठेवण्याचा प्रयत्न करणाऱ्यांचे मनसुबे उधळून लावले जातील आणि या दबावाला झुगारून लावत भारत देश एक स्थिर आणि मजबूत कार्यरत राहील . जे त्रास देत होते त्यांना उचलून बाजूला फेकले जाईल अशी भाकणूक श्रीक्षेत्र वडवळ (ता. मोहोळ ) येथील श्री नागनाथ महाराजांच्या यात्रेत खर्गाच्या दिवशी मुख्य मानकरी खर्गेमहाराज पोपटबुवा शिवपुजे यांनी वर्तविली .
भक्तिमय वातावरणात श्रीक्षेत्र वडवळ येथील श्री नागनाथ महाराजांच्या यात्रेस गुरुवारी २ एप्रिल रोजी तैलाभिषेकाने सुरुवात झाली असून रविवारी ५ रोजी श्रीक्षेत्र मोहोळ येथून श्रींची पालखी श्रीक्षेत्र वडवळ येथे रात्री १२ वा.आल्यानंतर सोमवार दि.६ रोजी पहाटे खर्गतीर्थावर गुरुशिष्य भेट झाली. हा नयनरम्य सोहळा पाहण्यासाठी हजारों भाविक उपस्थित होते.मोहोळ तालुक्यातील श्री क्षेत्र वडवळ येथील श्री नागनाथ महाराजांच्या यात्रेत दि.६ एप्रिल रोजी पहाटे चार वाजता खर्गाची मिरवणूक निघाली. टाळ अभंगाच्या गजरात खर्गतीर्थावर गुरु -शिष्य भेट झाली.सोलापूर जिल्ह्यासह महाराष्ट्रातील भाविकांचे श्रद्धास्थान असणाऱ्या श्री नागनाथ महाराजांच्या यात्रेत पहाटे चार वाजता
खर्गे महाराज
पोपटबुवा शिवपुजे यांच्याअंगात वायु रूपाने श्री नागनाथांचा संचार होवून पालखीसह सवाद्य साकी व अभंग म्हणत जयघोष करित मिरवणुक निघाली. प्रत्येक भाविकांना वायु रूपाने संचार झालेली खर्गाची मिरवणूक व खर्गतीर्थ भेटीचा सोहळा पाहण्याची ओढ असते. श्री नागनाथांचे मुख्य मानकरी खर्गे महाराज व परमशिष्य हेग्रसाचे वंशज अरूणबुवा मोहोळकर (काका) या गुरु शिष्य भेटीचा नयनरम्य सोहळा पाहण्यासाठी गर्दी भाविकांनी केली होती. खर्गे महाराजांनी पाऊस काळाची भाकणूक वर्तवताना यंदाच्या वर्षी पाऊसकाळ व चारा समाधानकारक असेल, रोगराई होवून काही प्रमाणात जीवीतहानी होईल अशी भाकणूक वर्तवली.पालखीसह निघालेली खर्गाची मिरवणुक मंदिरात पोहचल्यानंतर महाआरती झाली. त्यानंतर प्रसादाचे वाटप करण्यात आले. यावेळी नागनाथ देवस्थान पंचकमिटीतील सदस्य, यात्रा कमिटी,सर्व जाती धर्मातील मानकरी, सेवेकरी, नागेश भक्त मोठ्या संख्येने उपस्थित होते.
*मंदिराच्या मुख्य दिल्ली* *दरवाजामध्ये खर्गे महाराजांच्या संचार अवतारातील सांकेतिक खुणा वरून देशातील राजकीय परिस्थितीवरचीभाकणूक वर्तविण्यात झाली*
