पंढरपूर – धर्मादाय योजनेअंतर्गत उपचारांचा लाभ न मिळाल्याने केईएम (KEM) हॉस्पिटल, पुणे येथे उपचारासाठी १० लाख २५ हजार रुपये भरावे लागलेल्या पंढरपूर तालुक्यातील सौ.अश्विनी सोमनाथ पाटील यांना दिलासा मिळण्याचा मार्ग मोकळा झाला आहे. या प्रकरणाची गंभीर दखल घेत आमदार अभिजीत पाटील यांनी विधानसभेच्या अधिवेशनात हा प्रश्न उपस्थित करून रुग्णांच्या हक्कांसाठी आवाज उठवला. या बरोबरच पुणे विभागाचे धर्मादाय सहआयुक्त यांच्याकडे लेखी तक्रार करून संबंधित रुग्णालयाविरोधात कारवाईची मागणी केली होती.
आमदार अभिजीत पाटील यांच्या या पाठपुराव्याला यश आले असून, धर्मादाय सहआयुक्त तथा देखरेख समितीने केईएम (KEM ) हॉस्पिटलला संबंधित रुग्णाच्या नातेवाइकांना १० लाख २५ हजार रुपये १५ दिवसांच्या आत परत करण्याचे निर्देश दिले आहेत. हा आदेश ७ ऑक्टोबर २०२६ रोजी पारित करण्यात आला आहे.
———————
चौकट : ( विधानसभेच्या अधिवेशनात आमदार अभिजीत पाटील यांनी मांडला रुग्णांच्या हक्कांचा प्रश्न )
धर्मादाय योजनेअंतर्गत पात्र रुग्णांना उपचारांचा लाभ मिळणे अपेक्षित असताना, प्रत्यक्षात रुग्णांना लाखो रुपयांचा खर्च करावा लागत असल्याचा गंभीर मुद्दा आमदार अभिजीत पाटील यांनी विधानसभेच्या अधिवेशनात उपस्थित केला. आर्थिकदृष्ट्या दुर्बल रुग्णांना उपचारांसाठी आर्थिक संकटाचा सामना करावा लागू नये आणि पात्र रुग्णांना धर्मादाय योजनेचा लाभ मिळावा, यासाठी त्यांनी सभागृहात आपली भूमिका ठामपणे मांडली.
अश्विनी पाटील यांच्या प्रकरणातही धर्मादाय योजनेअंतर्गत उपचारांचा लाभ न मिळाल्याने कुटुंबीयांना १० लाख २५ हजार रुपये भरावे लागल्याची बाब समोर आल्यानंतर आमदार अभिजीत पाटील यांनी या प्रकरणाचा पाठपुरावा सुरू केला. त्यांनी पुणे विभागाच्या धर्मादाय सहआयुक्तांना पत्र देऊन संबंधित रुग्णालयाविरोधात तक्रार दाखल केली आणि रुग्णाला भरलेली रक्कम परत मिळवून देण्याची मागणी केली. विधानसभेतील आवाज आणि प्रशासकीय पातळीवरील पाठपुरावा यामुळे या प्रकरणाला महत्त्व प्राप्त झाले.
————————-
चौकट : ( नेमके प्रकरण काय? )
सोलापूर जिल्ह्यातील पंढरपूर तालुक्यातील पटवर्धन कुरवली येथील सौ. अश्विनी सोमनाथ पाटील या २२ सप्टेंबर २०२५ रोजी उपचारासाठी केईएम (KEM) हॉस्पिटल, पुणे येथे दाखल झाल्या होत्या. त्यांच्यावर शस्त्रक्रिया करणे आवश्यक असल्याचे सांगण्यात आले होते. तक्रारदारांच्या म्हणण्यानुसार, संबंधित उपचार शासनाच्या योजनेअंतर्गत होऊ शकत असल्याचे डॉक्टरांकडून सांगण्यात आले होते. मात्र, शस्त्रक्रियेपूर्वी अनामत रक्कम म्हणून १० लाख २५ हजार रुपये भरण्यास सांगण्यात आले. एवढी मोठी रक्कम उभी करताना रुग्णाच्या कुटुंबीयांना आर्थिक अडचणींचा सामना करावा लागला होता.
त्यामुळे धर्मादाय योजने अंतर्गत उपचारांचा लाभ का मिळाला नाही, हा प्रश्न उपस्थित करत या प्रकरणात योग्य ती कार्यवाही करण्याची मागणी करण्यात आली. दरम्यान या प्रकरणाची सुनावणी आणि उपलब्ध कागदपत्रांचा विचार करून धर्मादाय सहआयुक्त तथा देखरेख समितीने तक्रार अर्ज क्रमांक १३/२०२६ मंजूर केला असल्याची माहिती आमदार अभिजीत पाटील यांनी दिली.
——————–
चौकट : ( १५ दिवसांत १०.२५ लाख परत करण्याचे आदेश )
धर्मादाय सहआयुक्त तथा देखरेख समितीने ७ ऑक्टोबर २०२६ रोजी दिलेल्या आदेशानुसार केईएम ( KEM ) हॉस्पिटल, पुणे यांना सौ.अश्विनी सोमनाथ पाटील यांच्या नावाने १०,२५,०००/- (दहा लाख पंचवीस हजार रुपये) इतक्या रकमेचा धनादेश आदेश प्राप्त झाल्यापासून १५ दिवसांच्या आत काढून देण्याचे निर्देश देखील देण्यात आले आहेत. या आदेशामुळे संबंधित रुग्णाच्या कुटुंबीयांना भरलेली रक्कम परत मिळण्याचा मार्ग मोकळा झाला आहे. धर्मादाय योजनेअंतर्गत पात्र रुग्णांना उपचारांचा लाभ मिळावा आणि अशा रुग्णांना आर्थिक अडचणींचा सामना करावा लागू नये, या दृष्टीने हा निर्णय महत्त्वपूर्ण मानला जात आहे.
———————-
चौकट : (आमदार अभिजीत पाटील यांचा रुग्णांच्या हक्कांसाठी ठाम पाठपुरावा )
सर्वसामान्य नागरिकांना गंभीर आजारांवरील उपचारांसाठी आर्थिक संकटाचा सामना करावा लागू नये, तसेच धर्मादाय योजनेचा लाभ पात्र रुग्णांपर्यंत पोहोचावा, यासाठी आमदार अभिजीत पाटील यांनी विधानसभेच्या अधिवेशनात प्रश्न उपस्थित करण्यापासून ते धर्मादाय सहआयुक्तांकडे तक्रार करण्यापर्यंत सातत्याने पाठपुरावा केला. विधानसभेत आवाज उठवून आणि प्रशासनाकडे प्रभावी पाठपुरावा करून रुग्णांच्या हक्कांचा प्रश्न ऐरणीवर आणणाऱ्या आमदार अभिजीत पाटील यांच्या प्रयत्नांमुळे अश्विनी पाटील यांच्या प्रकरणात दिलासादायक आदेश पारित झाला आहे. रुग्णांना न्याय मिळवून देण्यासाठी लोकप्रतिनिधींनी केलेल्या पाठपुराव्याचे हे महत्त्वपूर्ण उदाहरण ठरले आहे.
