सोलापूर –हैदराबाद रस्त्यावरील मुळेगावजवळ रोकड लुटून नेण्यासाठी कार अडवून चालकावर गोळीबार करून त्याच्याजवळील रोकड लुटून नेण्याचा प्रयत्न केल्याप्रकरणी सोलापूर तालुका पोलिसांनी आणखी एकाला अटक केली असून अटकेतील आरोपींची संख्या पाचवर पोहोचली आहे.
याबाबत कार चालक एजाज नबीलाल तांबोळी (वय 37, रा. कर्णिकनगर) यांनी दिलेल्या फिर्यादीवरून अज्ञात आरोपींवर गुन्हा दाखल करण्यात आला आहे. एजाज हे स्टील व्यापारी इब्राहिम मोतीवाला यांच्याकडे चालक म्हणून कामाला आहेत. दिवसभरातील रक्कम गोळा करून रात्री साडेनऊच्या सुमारास ते मुळेगाव येथे आपल्या मालकाला देण्यासाठी कारमधून निघाले होते. पाठीमागून कारमधून आलेल्या चोरट्यांनी त्यांच्यावर दोन गोळ्या झाडल्या होत्या. पोलिसांनी या गंभीर घटनेनंतर तपासाची चक्रे वेगाने फिरवून शुक्रवारी चार आरोपींना अटक केली आहे. त्यानंतर आणखी एकाला अटक केली आहे.
सदरची कामगिरी सोलापूर तालुका पोलीस ठाण्याचे पोलीस निरीक्षक कुंदन गावडे यांच्या नेतृत्वाखाली सहायक पोलीस निरीक्षक सोमनाथ कदम, पोलीस उपनिरीक्षक महेश घोडके, सहायक फौजदार विवेक सांजेकर, पोलीस अंमलदार राहुल महिंद्रकर, शशिकांत कोळेकर, महेश कटकधोंड, धनराज गायकवाड, अनंत चमके यांनी पार पाडली आहे .
