लातूर – “भारतीय संस्कृतीचे वसुधैव कुटुंबकम् व एकं सत् विप्रा बहुदा वदंती हा संदेशच जगाला विनाशापासन वाचवू शकतो. हाच संदेश रामेश्वर रूई येथे साकारलेल्या एकमेवाद्वितीय अशा ‘विश्वधर्मी मानवतातीर्थ भवना’ च्या माध्यमातून संपूर्ण जगाला देण्याचा छोटासा प्रयत्न आहे. विज्ञान आणि अध्यात्माच्या समन्वयातूनच जगात शांती नांदेल अशी श्रध्दा आणि पूर्ण निष्ठा आहे.” असे विचार विश्वधर्मी प्रा.डॉ. विश्वनाथ दा. कराड यांनी व्यक्त केले.
विश्व शांती केंद्र (आळंदी), माईर्स एमआयटी, पुणे भारत व मानवता तीर्थ रामेश्वर रुई यांच्या संयुक्त विद्यमाने जगातील सर्वात मोठ्या आणि विस्तीर्ण दालन असलेल्या ‘विश्वधर्मी मानवता तीर्थ भवनात’ लेखक लक्ष्मण सूर्यभान घुगे यांच्या लेखणीतून विश्वधर्मी प्रा.डॉ. विश्वनाथ दा. कराड यांच्या ज्ञान, विज्ञान आणि अध्यात्माची प्रयोगशाळा या संकल्पनेवर आधारीत ‘विश्वशांतीची महागाथा’ व संत श्री ज्ञानेश्वर माऊलींच्या संघर्षमय जीवनाचं सुंदर आख्यान महाकादंबरी ‘सुवर्णपिंपळ’ या ग्रंथांचे प्रकाशन विश्वधर्मी प्रा.डॉ. विश्वनाथ दा. कराड आणि मान्यवरांच्या हस्ते करण्यात आले.
यावेळी प्रगतशील शेतकरी काशीराम दा. कराड, डॉ. हनुमंतराव कराड, वरिष्ठ सल्लागार गिरीश दाते, संचालक डॉ. महेश थोरवे, डॉ. राऊत आणि योगेश पारखी उपस्थित होते.
डॉ. विश्वनाथ दा. कराड म्हणाले,” सध्या संंपूर्ण जगात विज्ञान व तंत्रज्ञानाच्या माध्यमातून सर्व सुख सुविधांसह झालेली परकोटीची भौतिक प्रगती असूनसुद्धा दुसरीकडे हिंसा, रक्तपात, द्वेष, गोंधळ, अराजकता, जातीधर्मातील तेढ, देशांच्या सीमा या सारख्या क्षुल्लक कारणांमुळे अत्यंत संशय, भिती व तणावाचे वातावरण निर्माण झालेले दिसून येते. आश वेळेश रामेश्वर रुई येथे उभारण्यात आलेल्या विश्वधर्मी मानवतातीर्थ भवनातून संपूर्ण जगाला शांतीचा संदेश देण्यात येत आहे.”
गिरीश दाते म्हणाले,” विज्ञानाच्या पायावर उभे राहून अध्यात्माचा दिवा पेटवणारे विश्वधर्मी प्रा.डॉ. विश्वनाथ दा. कराड यांनी ज्ञानेश्वर माऊलींच्या विचारांना स्वामी विवेकानंदांच्या तत्वधारेचा शेला बांधून विश्वशांती महायज्ञाचा आरंभ केला. त्यांनी विज्ञानाच्या शक्तिरूप हातात अध्यात्माच्या हृदयातला करुण रस सोपवला आहे. यातून विश्वशांती घडावी हे त्यांचे स्वप्न आता सत्यात उतरताना दिसत आहे.”
डॉ. महेश थोरवे म्हणाले,” विश्वशांती या संकल्प यात्रेचे शांतीदूत म्हणजे विश्वधर्मी प्रा.डॉ. विश्वनाथ कराड आहेत. त्यांचा एकूणच प्रवास ज्ञान, विज्ञान आणि अध्यात्म या तत्वमालेशी संवाद साधणारा आहे. त्यांनी रामेश्वर रुई या जन्मगावी बौद्ध विहार, मुस्लिम बांधवांसाठी मशीद उभारली, रामसेतू बांधला तसेच आता विश्वधर्मी मानवतातीर्थ भवनाचा उभारणी केली आहे. त्यांचे हे कार्य अद्वितीय आहे.”
लेखक लक्ष्मण सूर्यभान घुगे म्हणाले,”जग हे तंत्रज्ञानाच्या वेगाने एक विशिष्ट मार्गावर धावत आहे. याच महामार्गावरून प्रवास करताना प्रा.डॉ. विश्वनाथ कराड यांनी या वेगाला दिशा देणारा आत्मा नेमका कुठे आहे याचे मर्म जाणले. आयुष्यात परिवर्तन घडवून ज्ञानाची अद्भुत मंदिरं उभे केली. शिक्षण संस्था हे ज्ञान, विज्ञान आणि अध्यात्माची प्रयोगशाळा म्हणून उभी केली. त्यांनी सर्व धर्मातल्या माणसांना माणुसकीच्या सुंदर धाग्यांनी आणि स्वर बंधाने जोडले आहे.”
योगेश पारखी यांनी सूत्रसंचालन केले व आभार मानले.
