बार्शी – बार्शी शहर पोलीस ठाण्याच्या गुन्हे अन्वेषण विभागाने दि. 19 मे 2026 रोजी शहरातील विविध भागांत अवैध धंद्यांविरोधात विशेष मोहीम राबवत हातभट्टी दारू विक्री व कल्याण मटका जुगारावर धडक कारवाया केल्या. पोलीस निरीक्षक बालाजी कुकडे यांच्या मार्गदर्शनाखाली करण्यात आलेल्या या कारवाईत सहा जणांविरुद्ध महाराष्ट्र दारूबंदी कायदा व महाराष्ट्र जुगार प्रतिबंधक कायद्यान्वये गुन्हे दाखल करण्यात आले आहेत.
बार्शी शहरातील देशमुख प्लॉट, ख्रिश्चन स्मशानभूमी परिसरात फिरोज हबीब सय्यद (वय 40, रा. गाडेगाव रोड, बार्शी) हा इसम हातभट्टी दारू विक्री करत असल्याची माहिती पोलिसांना मिळाली होती. त्यानुसार छापा टाकून त्याच्याकडून 6 लिटर हातभट्टी दारू जप्त करण्यात आली. जप्त मुद्देमालाची किंमत 600 रुपये असल्याचे पोलिसांनी सांगितले.
त्यानंतर कसबा पेठ येथील बेदराई विहिरीजवळ पत्र्याच्या शेड परिसरात नितीन दत्तात्रय वीर (वय 27, रा. बारंगुळे प्लॉट, बार्शी) हा इसम देशी-विदेशी दारू विक्री करत असल्याची माहिती मिळाल्यानंतर पोलिसांनी कारवाई केली. त्याच्याकडून 24 पाऊचमध्ये भरलेली 6 लिटर हातभट्टी दारू जप्त करण्यात आली. या मुद्देमालाची किंमत 600 रुपये असल्याचे नमूद करण्यात आले आहे.
दरम्यान, शहरातील विविध भागांत सुरू असलेल्या कल्याण मटका जुगारावरही पोलिसांनी एकाच दिवशी सलग छापे टाकले.
एसटी स्टँड शेजारील राजे टपरी परिसरातून विलास दावित रणदिवे (वय 50, रा. सोलापूर रोड, बार्शी) याला पकडून त्याच्याकडून 160 रुपये रोख रक्कम, अंक आकडे लिहिलेला कागद व बॉलपेन जप्त करण्यात आले.
यशवंतराव चव्हाण सभागृहासमोरील महात्मा गांधी शॉपिंग सेंटरच्या पाठीमागील परिसरात रविंद्र तानाजी दराडे (वय 33, रा. खुरपे बोळ, बार्शी) हा इसम मटका जुगार चालवत असल्याचे आढळून आले. पोलिसांनी त्याच्याकडून 380 रुपये रोख रक्कम, अंक आकडे लिहिलेली चिठ्ठी व बॉलपेन जप्त केले.
तसेच वडर गल्ली शेजारील जयसिमा टपरी परिसरातून प्रशांत वसंत बारंगळे (वय 43, रा. नाळे प्लॉट, बार्शी) याच्यावर कारवाई करण्यात आली. त्याच्याकडून 130 रुपये रोख रक्कम व जुगार साहित्य जप्त करण्यात आले.
एसटी स्टँड परिसरातील लालपरी हेअर स्टाईल मेन्स पार्लरजवळ सतीश गोविंद सावळे (वय 54, रा. सावळे चाळ, सोलापूर रोड, बार्शी) हा इसम मटका जुगार घेत असल्याचे निदर्शनास आल्यानंतर पोलिसांनी त्याच्यावर छापा टाकून 350 रुपये रोख रक्कम, अंक आकडे लिहिलेली चिठ्ठी व बॉलपेन जप्त केले.
या सर्व कारवायांमध्ये पोकों सचिन राऊत, राहुल उदार, अविनाश पवार, अमोल माने, बाळकृष्ण मुठाळ, सोमवाड, बहिरे, तसेच इतर पोलीस कर्मचाऱ्यांनी सहभाग घेतला. सर्व आरोपींविरुद्ध महाराष्ट्र दारूबंदी कायदा कलम 65 (ई) तसेच महाराष्ट्र जुगार कायदा कलम 12 (अ) अंतर्गत गुन्हे दाखल करण्यात आले आहेत.
