सोलापूर : सोलापूरचे प्रसिद्ध साहित्यिक व शैक्षणिक व्यक्तिमत्त्व, कवी, लेखक आणि शिक्षक बशीर परवाज यांचे वयाच्या 82व्या वर्षी शुक्रवारी रात्री नोबल हॉस्पिटल, सोलापूर येथे निधन झाले. त्यांच्या निधनाच्या वृत्ताने सोलापूरच्या साहित्यिक व शैक्षणिक क्षेत्रात शोककळा पसरली आहे.
बशीर परवाज यांनी आपले संपूर्ण आयुष्य उर्दू भाषा व साहित्याच्या विकास, प्रसार आणि संवर्धनासाठी समर्पित केले. अध्यापनासोबतच काव्य, काव्यशास्त्र, पत्रकारिता, कादंबरी आणि नाटक लेखन अशा विविध साहित्यिक क्षेत्रांत त्यांनी आपल्या प्रतिभेचा ठसा उमटवला. ‘खयाल’ हा त्यांचा काव्यसंग्रह साहित्यविश्वात परिचित आहे. त्यांनी लिहिलेल्या नातिया रचना आणि गीतांचा महाराष्ट्रातील उर्दू शाळांमध्ये मोठ्या आवडीने वापर केला जातो. ते बालभारती, पुणे यांच्याशीही संबंधित होते. तसेच त्यांनी दीर्घकाळ प्रोग्रेसिव्ह उर्दू हायस्कूल येथे उर्दू शिक्षक म्हणून सेवा बजावली.
बशीर परवाज यांच्या साहित्यिक कार्यातील एक महत्त्वपूर्ण योगदान म्हणजे बझ्म-ए-गालिब, सोलापूर या साहित्यिक संस्थेला एका सक्रिय साहित्यिक चळवळीचे स्वरूप देऊन ती सातत्याने कार्यरत ठेवणे आहे. सेवानिवृत्तीनंतरही त्यांनी आपला संपूर्ण वेळ उर्दू भाषा व साहित्याच्या प्रसारासाठी समर्पित केली.
त्यांच्या निधनाने सोलापूरसह संपूर्ण साहित्यिक विश्वात हळहळ व्यक्त होत आहे. त्यांच्या पश्चात पत्नी, दोन मुले आणि दोन मुली असा परिवार आहे. त्यांच्या पार्थिवावर जडे साहेब कब्रस्तान येथे नमाज-ए-जनाजानंतर अंत्यसंस्कार करण्यात आले.
