सोलापूर : शेतातील इलेक्ट्रिक पंप व पाणबुडी मोटारींमधील तांब्याची तार (कॉपर वायर) चोरी करणाऱ्या एका सराईत चोरट्याला ग्रामीण स्थानिक गुन्हे शाखेच्या पोलीस पथकाने अटक करून एकूण ३ लाख ४ हजार २०० रुपयांचा मुद्देमाल जप्त केला आहे.चोरीचे तब्बल ११ गुन्हे उघडकीस आणण्यात पोलिसांना यश आले आहे.
पोलीस अधीक्षक अतुल कुलकर्णी यांच्या आदेशानुसार एलसीबीचे वरिष्ठ पोलीस निरीक्षक संजय जगताप यांच्या नेतृत्वाखाली सहाय्यक पोलीस निरीक्षक ज्ञानदेव वाघ , फौजदार ख्वाजा मुजावर व पोलीस पथक मोहोळ परिसरात तपास करत होते. त्यावेळी सय्यद वरवडे (ता. मोहोळ) येथील रेकॉर्डवरील इसम कॉपर वायर चोरी करत असल्याची गोपनीय माहिती मिळाली. पथकाने छापा टाकून रवींद्र ऊर्फ रवी ऊर्फ गोट्या चंद्रकांत पवार (वय २५, रा. सय्यद वरवडे) यास ताब्यात घेतले.
कौशल्यपूर्ण चौकशीत आरोपीने साथीदार पप्पू शिंदे (रा. तामदर्डी, ता. मंगळवेढा) याच्या मदतीने मोहोळ, पंढरपूर व उत्तर सोलापूर तालुक्यातील विविध गावांमधून रात्रीच्या वेळी मोटारी व केबल चोरल्याची कबुली दिली. शेतात मोटारी फोडून व केबल जाळून वायर पोत्यात भरून विक्री केली जात होती. पोलिसांनी त्याच्या घराजवळील खोलीतून १३ प्लास्टिक पोत्यांमध्ये भरलेली २३५ किलो कॉपर वायर जप्त केली. तपासात मोहोळ येथील ७, सोलापूर तालुका १ आणि पंढरपूर तालुका १ आणि पंढरपूर ग्रामीण २ येथील दाखल ११ गुन्ह्यांची उकल झाली असून आरोपीला मोहोळ पोलिसांच्या ताब्यात देण्यात आले आहे.
सदरची कामगिरी पोलीस अधिक्षक अतुल कुलकर्णी, अपर पोलीस अधिक्षक विजय कबाडे, अपर पोलीस अधिक्षक प्रेरणा कट्टे यांचे मार्गदर्शनाखाली ग्रामीण स्थानिक गुन्हे शाखेचे वरिष्ठ पोलीस निरीक्षक संजय जगताप यांचे नेतृत्वाखाली स्थानिक गुन्हे शाखेचे सपोनि ज्ञानदेव वाघ, पोलीस उपनिरीक्षक ख्वाजा मुजावर, सफौ. नारायण गोलेकर, धनाजी गाडे, हवालदार नागेश कोणदे, मोहन मनसावाले, अंमलदार दिनेश पवार, कोंडिबा मोरे, अक्षय डोंगरे, सतिष बुरकुल, अश्विनी गोटे यांनी पार पाडली आहे.
