सोलापूर – पुण्यश्लोक अहिल्यादेवी होळकर शेतकरी कर्जमुक्ती योजना अंतर्गत सोलापूर जिल्ह्यातील पात्र शेतकऱ्यांसाठी दिलासादायक माहिती समोर आली आहे. जिल्ह्यातील १,०७८ गावांतील पात्र शेतकऱ्यांची दुसरी यादी प्राप्त झाली असून, या यादीतील लाभार्थ्यांनी फार्मर आयडी (अॅग्रीस्टॅक) आणि आधार प्रमाणीकरण ही प्रक्रिया तातडीने पूर्ण करण्याचे आवाहन जिल्हा उपनिबंधक मुकुंद पवार यांनी केले आहे.
यापूर्वी २२ जुलै २०२६ रोजी जिल्हा मध्यवर्ती सहकारी बँकेमार्फत केवळ २१ शेतकऱ्यांची पहिली यादी प्राप्त झाली होती. त्यानंतर शुक्रवारी उशिरा जिल्ह्यातील विविध तालुक्यांतील एकूण १,०७८ पात्र शेतकऱ्यांची दुसरी यादी प्रशासनाला प्राप्त झाली आहे. त्यामुळे कर्जमाफीच्या प्रक्रियेला आता वेग आला असून, अधिकाधिक पात्र शेतकऱ्यांना लाभ मिळण्याचा मार्ग मोकळा झाला आहे.
मात्र, केवळ यादीत नाव असणे पुरेसे नसून फार्मर आयडी (अॅग्रीस्टॅक) असणे अनिवार्य करण्यात आले आहे. ज्यांच्याकडे अद्याप फार्मर आयडी उपलब्ध नाही, त्यांनी तो तातडीने तयार करून घ्यावा, अन्यथा कर्जमाफीचा लाभ मिळण्यात अडचणी येऊ शकतात, असे प्रशासनाने स्पष्ट केले आहे.
तसेच, यादीतील सर्व पात्र शेतकऱ्यांनी आपले सरकार सेवा केंद्र किंवा सीएससी (कॉमन सर्व्हिस सेंटर) येथे जाऊन आधार प्रमाणीकरण करून घेणे आवश्यक आहे. ही प्रक्रिया पूर्ण झाल्यानंतरच कर्जमाफीची पुढील कार्यवाही होणार आहे.
कोट
आधार प्रमाणीकरणाची प्रक्रिया पूर्णपणे विनामूल्य आहे. कोणत्याही केंद्रावर या कामासाठी शुल्क किंवा अतिरिक्त रक्कम देऊ नये. कोणी पैसे मागितल्यास संबंधित अधिकाऱ्यांकडे तक्रार करण्याचे आवाहनही जिल्हा उपनिबंधक मुकुंद पवार यांनी केले.
चौकट
कर्जमाफीची दुसरी यादी जाहीर झाल्याने जिल्ह्यातील अनेक शेतकऱ्यांमध्ये समाधानाचे वातावरण असून, उर्वरित पात्र लाभार्थ्यांच्या याद्याही लवकरच जाहीर होतील, अशी अपेक्षा व्यक्त होत आहे. प्रशासनाने पात्र शेतकऱ्यांना आवश्यक कागदपत्रे वेळेत पूर्ण करून कर्जमाफीचा लाभ निश्चित करण्याचे आवाहन केले आहे.
चौकट
तालुकानिहाय प्राप्त झालेल्या यादीत अक्कलकोट – १२६, बार्शी – १२३, करमाळा – १२०, माढा – ११४, माळशिरस – १०६, पंढरपूर – ९७, मोहोळ – ९४, दक्षिण सोलापूर – ८७, सांगोला – ८२, मंगळवेढा – ७६ आणि उत्तर सोलापूर – ५२ शेतकऱ्यांचा समावेश आहे.
