सोलापूर: भारतीय घटनेचे शिल्पकार डॉ. बाबासाहेब आंबेडकर यांच्या 135 व्या जयंतीनिमित्त साऊथ सोलापूर आपटे ग्रुप क्रिकेट क्लबच्या वतीने सोलापूर जिल्ह्यामधील बारा वर्षाखालील क्रिकेट खेळाडूंसाठी एक दिवसीय सामन्यांचे आयोजन सोलापूर येथील दयानंद कॉलेज येथील मैदानावर करण्यात आले होते. या स्पर्धेमध्ये सोलापूर जिल्ह्यामधील एकूण आठ संघाने सहभाग नोंदविला होता. ही स्पर्धा साखळी पद्धतीने खेळविण्यात आली. या स्पर्धेचा अंतिम सामना साऊथ सोलापूर आपटे ग्रुप क्रिकेट क्लब विरुद्ध श्री स्वामी समर्थ क्रीडा भारती क्रिकेट ॲकॅडमी यांच्यात झाला प्रथम फलंदाजी करताना साऊथ सोलापूर क्रिकेट संघाने ४५ षटकात सात बाद ३३२ धावा केल्या. साऊथ सोलापूर कडून तन्मय वाघमोडे याने शतकी खेळी करत १०३ धावा केल्या, तर वेदांत भोसले याने ९६ धावा केल्या. श्री स्वामी समर्थ संघाकडून आदित्य चटके व अर्णव जोशी यांनी प्रत्येकी दोन गडी बाद केले. ३३२ धावांचा पाठलाग करताना श्री स्वामी समर्थ क्रिकेट ॲकॅडमीला हे आवाहन पेलवले नाही. त्यांचा संघ सर्व बाद १६५ धावाच करू शकला. त्यांच्या संघाकडून यशराज शिंदे याने सर्वाधिक ३९ धावा केल्या तर आदित्य चटके याने २२ धावा केल्या. साऊथ सोलापूर संघाकडून तन्मय वाघमोडे यांनी ४ गडी बाद केले. साउथ सोलापूर आपटे ग्रुप क्रिकेट क्लबने हा सामना १६७ धावांनी जिंकून डॉ. बाबासाहेब आंबेडकर चषक क्रिकेट स्पर्धेचे विजेतेपद पटकावले. या स्पर्धेचे पारितोषिक वितरण साऊथ सोलापूर आपटे ग्रुप क्रिकेट क्लबचे सर्वेसर्वा गुरुवर्य अशोक टिळक सर यांच्या शुभहस्ते करण्यात आला तर यावेळी माजी ज्येष्ठ क्रिकेटपटू अनिल सांब्रानी, राष्ट्रवादी युवक काँग्रेसचे प्रदेश उपाध्यक्ष प्रशांत बाबर, रणजीपटू प्रवीण देशेट्टी, रोहित जोशी आदी उपस्थित होते.
मालिकेतील वैयक्तिक पारितोषिके
१. उत्कृष्ट फलंदाज- तन्मय वाघमोडे
२. उत्कृष्ट गोलंदाज- आदित्य चटके
३. उत्कृष्ट क्षेत्ररक्षण- नील कोंडा
३. मालिकावीर- तन्मय वाघमोडे
