सोलापूर : ‘मला काय मिळाले?’ यापेक्षा ‘मी काय दिले?’ हा विचार महत्त्वाचा आहे. ‘माझी संस्था, माझे कर्तव्य आणि माझे योगदान’ या भावनेतून जबाबदारी पार पाडणे, संस्थेच्या विकासासाठी योगदान देणे आणि माणसांना परस्परांशी जोडणे, हाच माणुसकीचा धर्म असून जैन तत्त्वज्ञानाच्या आचरणाचीही ती पहिली पायरी आहे, असे प्रतिपादन मुनीश्री १०८ सुप्रभसागरजी महाराज यांनी केले. नैतिक शिक्षणासाठी विशेष उद्बोधन देताना त्यांनी हे विचार मांडले.
वालचंद शिक्षण समूहातील शिक्षक व शिक्षकेतर कर्मचाऱ्यांसाठी शनिवारी (दि. २४ ऑक्टोबर) वालचंद इन्स्टिट्यूट ऑफ टेक्नॉलॉजी येथे ‘सम्यकज्ञान’ विषयावर आयोजित विशेष प्रवचनात ते बोलत होते. या वेळी मुनीश्री प्रणतसागरजी महाराज आणि क्षुल्लकश्री विप्रज्ञसागरजी महाराज उपस्थित होते.
कुटुंब हा मानवी जीवनाचा मुख्य आधार असून, नातेवाईक आणि आप्तेष्टांसह सुख-दुःखात सहभागी होऊन परस्परांना आधार देणे महत्त्वाचे आहे. मोठी घरे, संपत्ती आणि सुखसोयींपेक्षा माणुसकी, जिव्हाळा आणि सहकार्य श्रेष्ठ आहे. संपत्तीचा उपयोग इतरांच्या कल्याणासाठी करण्यातच तिचे खरे सार्थक आहे, असे महाराजांनी सांगितले.
या प्रसंगी आचार्य विरागसागरजी महाराज आणि आचार्य विशुद्धसागरजी महाराज यांच्या प्रतिमेचे अनावरण वालचंद शिक्षण समूहाचे मानद सचिव डॉ. रणजित गांधी, सौ. माया गांधी, विश्वस्त पराग शहा, वैभव गांधी तसेच समूहातील सर्व प्राचार्य यांच्या उपस्थितीत करण्यात आले. या प्रवचनाचा लाभ सोलापूरमधील जैन समाजबांधवांनी मोठ्या संख्येने घेतला.
‘माझी संस्था, माझे कर्तव्य आणि माझे योगदान’ या भावनेतून शिक्षक, शिक्षकेतर कर्मचारी, विद्यार्थी, पालक आणि व्यवस्थापनाने संस्थेच्या प्रगतीसाठी सक्रिय सहभाग नोंदवावा.
आधुनिक तंत्रज्ञान आणि भौतिक सुविधांसोबत विद्यार्थ्यांना संवेदनशील, जबाबदार व समाजाभिमुख नागरिक म्हणून घडवणे, हेच शिक्षणाचे खरे उद्दिष्ट आहे. प्रत्येकाने कर्तव्याचे प्रामाणिकपणे पालन करून समाजाच्या उन्नतीसाठी योगदान द्यावे, हा महाराजांनी दिलेला गुरुमंत्र आहे.
