सोलापूर – स्थानिक स्वराज्य संस्थांच्या निवडणुकीच्या पार्श्वभूमीवर राष्ट्रवादी काँग्रेस (शरद पवार गट) ला मोठा धक्का बसला आहे. सोलापुरातील शरद पवार गटाचे शहराध्यक्ष सुधीर खरटमल यांनी अधिकृतपणे राष्ट्रवादी काँग्रेस (अजित पवार गटामध्ये प्रवेश केला आहे. हा पक्ष प्रवेश मुंबई येथे सोलापूर महापालिकेच्या अनुषंगाने राष्ट्रवादी काँग्रेसने आयोजित केलेल्या आढावा बैठकीत झाला असून, उपमुख्यमंत्री अजित पवार यांनी सुधीर खरटमल यांच्या गळ्यात राष्ट्रवादीचा शेला घालून त्यांचे पक्षात स्वागत केले. यावेळी प्रदेशाध्यक्ष सुनील तटकरे, राज्य महिला आयोगाचे अध्यक्ष रूपाली चाकणकर, पक्षाचे सोलापूर संपर्क मंत्री तथा राज्याचे कृषिमंत्री दत्तात्रेय भरणे, शहराध्यक्ष संतोष पवार, प्रदेश उपाध्यक्ष आनंद चंदनशिवे, किसन जाधव, तसेच राज्य पातळीवरील नेते आणि पदाधिकारी कार्यकर्ते उपस्थित होते. सुधीर खरटमल यांच्या पक्ष प्रवेशामुळे सोलापूर शहराच्या राजकारणात मोठे फेरबदल होण्याची शक्यता व्यक्त केली जात आहे. सुधीर खरटमल यांचे कार्यकर्ते देखील अजित पवार यांच्या राष्ट्रवादीत प्रवेश करणार आहेत. उपमुख्यमंत्री अजित पवार लवकरच सोलापूर दौऱ्यावर येणार असून त्यावेळी असंख्य कार्यकर्ते तसेच माजी महापौर दिग्गज नेते देखील अजित पवार यांच्या राष्ट्रवादी प्रवेश करणार असल्याचे सुधीर खरटमल यांनी सांगितले.
दरम्यान, शरद पवार यांच्या राष्ट्रवादी पार्टीमध्ये गेल्या काही दिवसांपासून अध्यक्ष विरुद्ध पदाधिकारी असा वाद सुरू झाला होता. सुधीर खरटमल यांच्या विरोधाचे लोण थेट गोविंद बागेच्या अंगणात जाऊन थडकले होते. गत सोमवारी शरद पवार यांच्या बारामती येथील “गोविंदबाग ” या निवासस्थानी जाऊन शहराच्या काही पदाधिकाऱ्यांनी थेट आपले गाऱ्हाणे राष्ट्रवादीचे सर्वेसर्वा शरद पवार यांच्यासमोर मांडले. त्यामध्ये मुंबई येथे शरद पवार यांनी बोलावलेल्या बैठकीमध्ये शहराध्यक्ष सुधीर खरटमल यांनी बैठकीस स्वतः न जाता आपल्या कार्यकर्त्याला पाठवल्याचा विषय चिघळला. याच मुद्द्यावरून शरद पवार यांनी शहराध्यक्ष सुधीर खरटमल यांची चांगलीच कान उघडणी केल्याची माहिती समोर आली होती. काही निवडक पदाधिकाऱ्यांच्या बैठकीत हा विषय गाजला होता. यावेळी मात्र शहराध्यक्ष सुधीर खरटमल यांनी शरद पवार यांच्यासमोर घडलेल्या घटनेनंतर आपल्या चुकीची कबुली दिली होती. मात्र पक्षांतर्गत सुरू असलेल्या राजकारणाला वैतागून हा निर्णय घेतला असल्याचे त्यांनी सांगितले .
दरम्यान, याच घटनेवरून आता काही पदधिकाऱ्यांनी राष्ट्रवादी काँग्रेस पार्टीच्या पदाचा राजीनामा दिल्याची माहिती समोर येत आहे. राष्ट्रवादीचा अंतर्गत वाद उफाळून येत असताना शहराध्यक्षांच्या बाजूने राजीनामा नाट्य सुरू असल्याचे दिसून येत आहे. पक्षांतर्गत घडलेल्या या घटनेनंतर नाराज असलेले सुधीर खरटमल यांनी टोकाचा निर्णय घेत, आपल्या अध्यक्षपदाचा राजीनामा दिला. ऐन स्थानिक स्वराज्य संस्थांच्या निवडणुकीच्या तोंडावर शरद पवारांच्या राष्ट्रवादीत पक्षांतर्गत कुरघोड्या सुरु असल्याचे दिसून येत आहे. तत्पूर्वी स्थानिक स्वराज्य संस्था आणि महापालिका निवडणुकीच्या अनुषंगाने पक्षाचे सर्वेसर्वा शरद पवार यांनी प्रमुख पदाधिकाऱ्यांची मुंबईमध्ये बैठक बोलावली होती. याबैठकीस सोलापूर शहर राष्ट्रवादी काँग्रेस पार्टीचे अध्यक्ष सुधीर खराटमल यांनी स्वतः न जाता आपल्या कार्यकर्त्याला पाठवले. दस्तुरखुद शरद पवार यांच्या बैठकीला अध्यक्षांनी दांडी मारल्याने तसेच पूर्वाश्रमीच्या भाजपचे कार्यकर्ते असणाऱ्या महेश गाडेकर यांना आपला जवळचा कार्यकर्ता म्हणून बैठकीला पाठवल्याने राष्ट्रवादीच्या निष्ठावंत कार्यकर्त्यांचा राग अनावर आला. यामुळे राष्ट्रवादीचे शहरातील राजकारण चांगलेच तापले. यावरून शहर राष्ट्रवादीमध्ये अध्यक्ष विरुद्ध कार्यकर्ता असा कलगीतुरा पहावयास मिळाला होता.
अजित पवार यांच्या सोलापूर दौऱ्यात अनेक दिग्गज नेते करणार पक्षप्रवेश
शरद पवारांच्या राष्ट्रवादीत गेल्या काही दिवसांपासून पक्षांतर्गत वाद चव्हाट्यावर येत आहे. यातूनच अनेक दिग्गज नेते नाराज असल्याचे बोलले जात आहे. या महिन्यात उपमुख्यमंत्री अजित पवार हे सोलापूर दौऱ्यावर येणार आहेत. त्यांच्या दौऱ्यावेळी शरद पवार यांच्या पक्षातील अनेक दिग्गज नेते माजी महापौर व नगरसेवक अजित पवार यांच्या पक्षात प्रवेश करणार असल्याचे सांगण्यात येत आहे.
सुधीर खरटमल यांनी शहरातील विविध संघटनात्मक कामांमध्ये सक्रिय भूमिका बजावली.
सुधीर खरटमल हे शरद पवार गटाचे सोलापूर शहराध्यक्ष म्हणून सक्रियपणे काम पाहत होते. त्यांनी गेल्या काही महिन्यांत शहरातील विविध संघटनात्मक कामांमध्ये सक्रिय भूमिका बजावली होती. मात्र, गटांतील अंतर्गत मतभेद आणि आगामी निवडणुकांतील संधी लक्षात घेऊन त्यांनी अजित पवार गटात प्रवेश दिला आहे. त्याचा फायदा पक्षाला होईल.
– संतोष पवार, शहराध्यक्ष राष्ट्रवादी काँग्रेस पार्टी
(अजित पवार गट )
सुधीर खरटमल यांच्या प्रवेशानंतर अजित पवार गटात उत्साहाचे वातावरण आहे. “खरटमल यांच्यासारखा मजबूत संघटनात्मक कार्यकर्ता आमच्या गटात आल्यानं सोलापुरात राष्ट्रवादी अजित पवार गट आणखी बळकट होणार आहे. सोलापूर महापालिकेच्या निवडणुकांपूर्वी राजकीय घडामोडींना वेगळे वळण लावणारा मोठा टप्पा मानला जात आहे. सुधीर खरटमल यांच्या प्रवेशामुळे सोलापुरातील राष्ट्रवादी अजित पवार गटाची संघटनात्मक ताकद निश्चितच वाढणार आहे.
फोटो ओळ – सुधीर खरटमल यांनी शरद पवार यांच्या राष्ट्रवादी पक्षाचा राजीनामा देत मुंबईमध्ये उपमुख्यमंत्री अजित पवार यांच्या राष्ट्रवादी काँग्रेसमध्ये प्रवेश केला.
