पंढरपूर – पंढरपूर नगरपरिषद निवडणुकीसाठी प्रशासनाने तयारी सुरू केली आहे. याच पार्श्वभूमीवर गुन्हेगारी प्रवृत्तीच्या व्यक्तीवर करडी नजर ठेवण्यात येणार आहे. निवडणुका शांततेत पार पडाव्यात यासाठी प्रशासनाने खबरदारी घेतली असल्याचे दिसून येत आहे.
पंढरपूर नगरपरिषद निवडणूक निर्णय अधिकारी म्हणून प्रांताधिकारी सचिन इथापे यांची नियुक्ती जिल्हाधिकारी कुमार आशीर्वाद यांनी केली आहे. निवडणूक शांततेत पार पडावी, यासाठी प्रांताधिकारी सचिन इथापे यांनी नुकतीच पत्रकार परिषद घेतली. या पत्रकार परिषदेमध्ये आदर्श आचारसंहिता व इतर निवडणुकीबाबीची माहिती दिली.
यावेळी प्रांताधिकारी इथापे म्हणाले, पंढरपूर शहरातील सर्व मतदान केंद्राची तपासणी करण्यात येणार आहे. या ठिकाणी मतदारांना सुविधा देण्यात येणार आहेत. संवेदनशील मतदान केंद्रावर करडी नजर ठेवण्यात येणार असून पोलीस बंदोबस्त व सीसीटीव्ही कॅमेरे लावण्यात येणार आहेत. निवडणुका शांततेत पार पडाव्यात, यासाठी पोलीस प्रशासनाने गुन्हेगारी प्रवृत्तीच्या व्यक्तींची नावे काढून त्यांच्यावर कारवाई करण्याचे निर्देश देण्यात आले आहेत.एकंदरीत पंढरपूर नगर परिषदेची निवडणूक शांततेत पार पडावी. यासाठी प्रशासनाने तयारी सुरू केली असल्याचे दिसून येत आहे.
सीमा होळकर असणार निवडणूक निर्णय अधिकारी –
पंढरपूर नगरपरिषद निवडणूक निर्णय अधिकारी म्हणून प्रांताधिकारी सचिन इथापे यांची नियुक्ती जिल्हाधिकारी कुमार आशीर्वाद यांनी केली आहे. मात्र जिल्हाधिकाऱ्यांनी काढलेल्या सुधारित आदेशानुसार श्रीमती सीमा होळकर ( उपजिल्हाधिकारी भूसंपादन क्रमांक सात ) या पंढरपूर नगरपरिषद निवडणुकीसाठी निवडणूक निर्णय अधिकारी काम पहाणार असल्याची माहिती येथील प्रांताधिकारी सचिन इथापे यांनी दिली.
——————–
आकडे बोलतात –
निवडणूकीसाठी शहर आणि उपनगरात मिळून ९७ मतदान केंद्रे. एकुण मतदार संख्या ९४ हजार ५५९ इतकी आहे. नऊ क्षेत्रीय अधिकारी तैनात त्यांच्यामार्फत देखरेख. ज्या ठिकाणी तीन पेक्षा जास्त मतदान केंद्रे असतील तिथे जास्तीचा पोलिसबंदोबस्त असणार.
——————
गुन्हेगारी पार्श्वभूमी असणाऱ्या मंडळींवर कडक कारवाई –
पंढरपूर नगरपरिषद निवडणुकी दरम्यान गुन्हेगारावर प्रशासनाकडून करडी नजर ठेवली जाणार असून पोलिस प्रशासनाच्या मदतीने अशी गुन्हेगारी पार्श्वभूमी असलेल्यां मंडळींवर हद्दपारी वैगरे प्रतिबंधात्मक कडक कारवाई करण्यात येणार असल्याचे येथील प्रांताधिकारी सचिन इथापे यांनी सांगितले.
——————–
प्रांताधिकाऱ्यांच्या सुचना –
बेकायदेशीर होर्डिंग्ज, बँनर्स तातडीने काढून घ्यावेत अन्यथा मालमत्ता विद्रुपीकरण कायद्या अंतर्गत केली जाणार कारवाई.प्रिटींगप्रेस धारकांनी देखील घातलेले निर्बंध लक्षात घेऊन आणि सुचनांचे पालन करुन पोस्टर्स, बँनर्स छापुन द्यावेत. राखीव प्रवर्गातून निवडणूक लढविणाऱ्या उमेदवारांसाठी अनामत रक्कम एक हजार तर सर्वसाधारण प्रवर्गांसाठी दोन हजार रुपये अनामत रक्कम असणार आहे. राखीव प्रवर्गातून निवडणूक लढविणाऱ्या उमेदवारांसाठी जातपडताळणी प्रमाण सादर करण्यासाठी सहा महिन्यांची मुदत असणार आहे. प्रत्येक उमेदवाराने नामनिर्देशन पत्रामध्ये शपथपत्र सादर करावयाचे असून या मध्ये सर्व स्थावर, जंगम मालमत्ता तसेच गुन्हेगारी पार्श्वभूमीचा तपशील जर असेल तर तो बिनचुक कोणतीही माहिती राखून न ठेवता प्रसिध्द करावयाचा आहे.
