सोलापूर : महाराष्ट्र विधान परिषद द्विवार्षिक निवडणूक 2026 च्या मतदानाच्या दुसऱ्या टप्प्यासाठी येथील सर्व संबंधित अधिकारी व कर्मचाऱ्यांना प्रशिक्षण देण्यात आले. उपजिल्हाधिकारी संतोष कुमार देशमुख, सहाय्यक निवडणूक निर्णय अधिकारी तथा निवासी उपजिल्हाधिकारी अभिजीत पाटील, उपजिल्हा निवडणूक अधिकारी सुशांत बनसोडे तसेच सर्व संबंधित तहसीलदार अधिकारी व कर्मचारी उपस्थित होते.
उपजिल्हा निवडणूक अधिकारी सुशांत बनसोडे यांनी प्रशिक्षणासाठी उपस्थित सर्व अधिकारी व कर्मचाऱ्यांचे स्वागत केले. निवडणुकीसाठी मतदानाचे सहा केंद्र असून दोन उमेदवार आहेत. या निवडणूक प्रक्रियेसाठी एकूण 616 मतदार आहेत, अशी माहिती त्यांनी दिली.
निवडणूक जाहीर व आचारसंहिता दिनांक 18 मे 2026 रोजी लागू होणार असून मतदान दिनांक 18 जून 2026 रोजी सकाळी 8 ते दुपारी 4 या वेळेत होईल. मतमोजणी 22 जून 2026 रोजी करण्यात येणार आहे.
मतदान केंद्राच्या ठिकाणी मतदारांची यादी सर्व अधिकारी व कर्मचाऱ्यांना पुरविली जाईल. संबंधित अधिकारी व कर्मचारी यांनी आपल्या मतदान केंद्रावर ज्या मतदारांची यादी प्राप्त झाली आहे, त्या यादीची प्रथम खात्री करून घ्यावी. नगरपंचायत व नगरपरिषद केंद्रांमध्ये मतदान केंद्राच्या ठिकाणी मतदारांना ओळखण्यासाठी व्हिडिओ-सीईओ व संबंधित अधिकारी/प्रतिनिधी उपस्थित राहण्याच्या सूचना देण्यात आल्या.
निवडणूक साहित्य ताब्यात घेण्याबाबत सूचना देण्यात आल्या. दि. 17/06/2026 रोजी सकाळी 9.00 वा. नियोजन भवन सोलापूर येथे साहित्य वितरण होणार असून साहित्य वितरण केंद्रावर वेळेवर उपस्थित राहून साहित्य ताब्यात घ्यावे. निवडणूक निर्णय अधिकारी कार्यालय सोडण्यापूर्वी तसेच मतदान केंद्रावर पोहोचल्यानंतर साहित्याची खात्री पुन्हा-पुन्हा करावी आणि क्षेत्रीय अधिकाऱ्यांकडे अहवाल द्यावा, असे सांगण्यात आले.
महत्त्वाच्या साहित्याची तपासणी मतदान केंद्राध्यक्षांनी स्वतः करून घेणे आवश्यक आहे. त्यामध्ये मतपेटी, मतपत्रिका, जांभळ्या शाईचा स्केचपेन, हिरवे पेपर सील व अॅड्रेस टॅग, संविधानिक/असंविधानिक नमुने व लिफाफे, मतदान केंद्राध्यक्षांची दैनंदिनी/घोपणापत्र, मतदार यादीच्या चिन्हांकित प्रती, पक्क्या शाईचा पेन/शाईची बाटली, विभेदक चिन्ह असलेला रबरी शिक्का, तसेच उमेदवार व त्यांच्या प्रतिनिधी यांच्या नमुना स्वाक्षरीची प्रत यांचा समावेश असल्याचे प्रशिक्षणात नमूद करण्यात आले. सिलींग साहित्य म्हणून पितळी सिल व लाख, ढकलपट्टी, इशारा फलक यांचाही उल्लेख करण्यात आला.
मतपेटी गोदरेज कंपनीची असून ती उघडणे, सील बंद करणे यासंदर्भातील प्रशिक्षण होणार असल्याचे सांगण्यात आले. त्या मतपेटीवर अॅड्रेस टॅगवर मतदान केंद्राचे नाव, अनुक्रमांक, पत्ता व दिनांक अचूक लिहिण्याच्या सूचना देण्यात आल्या. उपजिल्हाधिकारी संतोष कुमार देशमुख यांनी सर्व उपस्थित अधिकारी व कर्मचारी यांचे आभार मानले.
