लोकप्रिय मराठमोळी अभिनेत्री हृता दुर्गुळे हिने चाहत्यांना गुड न्यूज दिली आहे. तिने नवं घर घेतलं आहे.
सध्या मराठी कलासृष्टीला सुगीचे दिवस आलेत. अनेक मराठी कलाकार आता स्वतःचं घर घेताना दिसत आहेत. तर कुणी स्वतःचा बिझनेस सुरू करतांना दिसत आहे. गेल्या काही महिन्यात अनेक मराठी कलाकारांनी स्वतःचं घर घेत चाहत्यांना आनंदाची बातमी दिली. प्राजक्ता माळी, प्रार्थना बेहेरे, राधा सागर, सई ताम्हणकर, सोनाली कुलकर्णी या कलाकारांनी नव्या घरात गृहप्रवेश करत चाहत्यांचा आनंद द्विगुणित केला होता. आता या कलाकारांच्या यादीत प्रेक्षकांच्या लाडक्या अभिनेत्रीचं नावही जोडलं गेलं आहे. लोकप्रिय मराठमोळी अभिनेत्री हृता दुर्गुळे हिनेदेखील स्वतःचं हक्काचं घर घेतलं आहे. त्याचा फोटो तिने चाहत्यांसोबत शेअर केला आहे.
हृताने ‘फुलपाखरू’ आणि ‘दुर्वा’ या मालिकांमधुन प्रेक्षकांच्या मनात घर केलं. तिने आपल्या अभिनयाने आणि सौंदर्याने चाहत्यांची मनं जिंकली. ती सोशल मीडियावरही कायम सक्रीय असते. चाहतेही तिच्या फोटो आणि व्हिडीओंना भरभरून प्रतिसाद देत असतात. अशातच तिने चाहत्यांना गुड न्यूज देत आनंदाचा धक्का दिला आहे. हृताने पती प्रतीक शाह याच्यासोबत मिळून स्वतःचं नवं घर घेतलं आहे. ही बातमी सांगताना तिने नवऱ्यासोबतचा रोमँटिक फोटोही शेअर केला आहे. हा फोटो त्यांच्या नव्या घरातला आहे. हा फोटो शेअर करत तिने लिहिलं, ‘भिंती आणि खांब, प्रेम आणि स्वप्न. नवीन सुरुवातीची जादू.’ यासोबतच तिने हॅशटॅग देत लिहिलं, ‘आमचं घर, आम्ही करून दाखवलं, सकारात्मक वाइब्स, आनंद, खास दिवस, कृतार्थ.’
हृताने ही बातमी देताच चाहत्यांनीही त्यांच्यावर कौतुकाचा आणि शुभेच्छांचा वर्षाव केला आहे. अमृता खानविलकर, अजिंक्य राऊत, सारिका नवाथे, दीप्ती देवी, रेवती लेले यांसारख्या अनेक कलाकारांनी त्यांच्यावर शुभेच्छांचा पाऊस पाडला आहे. सोबतच त्यांच्या पुढील आयुष्यासाठी त्यांना शुभेच्छा दिल्या आहेत. हृताच्या कामाबद्दल सांगायचं तर ती ‘अनन्या’, ‘टाइमपास ३’ या चित्रपटांमध्ये दिसली. तिच्या ‘सर्किट या चित्रपटातील भूमिकाही प्रचंड गाजली. ती लवकरच ‘कन्नी’ या चित्रपटात दिसणार आहे.
