मणिपूरच्या इम्फालमध्ये शुक्रवारी रात्री उशिरा झालेल्या आयईडी स्फोटात एकाचा मृत्यू झाला असून एक जण गंभीर जखमी झाला आहे. डीएम कॉलेज कॉम्प्लेक्समध्ये ही घटना घडली. या घटनेत ओईनम केनेगी नामक 24 वर्षीय तरुणाचा मृत्यू झाल्याची माहिती पोलिसांनी दिली.आतापर्यंत कोणत्याही संघटनेने या स्फोटाची जबाबदारी घेतलेली नाही.
इम्फाल पश्चिम जिल्ह्यातील लामफेलपट येथे काही अज्ञात लोकांनी युनायटेड कमिटी मणिपूर (यूसीएम) या सामाजिक संस्थेच्या कार्यालयाला आग लावली. तसेच शुक्रवारी दुपारी 12.45 वाजेच्या सुमारास काही अज्ञात लोकांनी इंफाळ पूर्व जिल्ह्यातील एका शाळेच्या प्रशासकीय विभागाची तोडफोड केली आणि नंतर ती पेटवून दिली. या घटनेत पार्किंगमध्ये उभ्या असलेल्या एका वाहनालाही आग लागल्याचे पोलिसांनी सांगितले. मणिपूरच्या चुराचंदपूर येथील इंडिजिनस ट्राइबल लीडर्स फोरम (आयटीएलएफ) या आदिवासी संघटनेने केंद्रीय गृहमंत्री अमित शहा यांना पत्र लिहून मेईती-बहुल भागात कुकी पोलिसांच्या सुरक्षेबद्दल चिंता व्यक्त केली होती. यानंतर बदली झालेल्या कर्मचाऱ्यांच्या हालचालींवर बंदी घालण्यात आली आहे.मणिपूर पोलिसांनी सध्या सुरू असलेल्या संकटाच्या पार्श्वभूमीवर बदली झालेल्या कर्मचाऱ्यांच्या हालचालींवर निर्बंध घातले आहेत. शक्यतोवर बदली झालेल्या कर्मचाऱ्यांना एका ठिकाणाहून दुसऱ्या ठिकाणी पाठवण्याचा निर्णय गरजेनुसार घेतला जाईल, असे पोलिसांनी सांगितले आहे. बदलीचे आदेश लागू राहतील, मात्र गरजेनुसार कर्मचाऱ्यांच्या बदल्या केल्या जातील असे स्थानिक अधिकाऱ्यांनी सांगितले.
