सोलापूर : सोलापूर महापालिका निवडणुकीसाठी आज प्रारूप मतदार यादी प्रसिद्ध करण्यात आली. या प्रारूप यादीवर 27 नोव्हेंबरपर्यंत हरकती व सूचना दाखल करता येणार आहे. 5 डिसेंबर रोजी अंतिम मतदार यादी जाहीर करण्यात येणार आहे. सन 2017 मध्ये झालेल्या सोलापूर महापालिका सार्वत्रिक निवडणुकीसाठी एकूण 6 लाख 73 हजार मतदार होते. यंदाच्या 2025 च्या निवडणुकीसाठी मतदार संख्येत 2 लाख 51 हजार मतदारांची वाढ झाली आहे. यंदा प्रारूप मतदार यादी मध्ये एकूण 9 लाख 24 हजार 706 मतदार असल्याचे दिसून येते.
महानगरपालिका सार्वत्रिक निवडणूक 2025 करिता राज्य निवडणूक आयोगाने 1 जुलै 2025 रोजी अस्तित्वात असलेल्या विधानसभा मतदार यादीच्या आधारे प्रभागनिहाय मतदार यादी विभाजनाचे काम केले आहे. सोलापूर महानगरपालिकेच्या अंतिम प्रभाग रचनेनुसार एकूण 26 प्रभागांकरिता प्रभागनिहाय मतदार यादी विभाजनाचे काम करण्यात आले आहे.महाराष्ट्र राज्य निवडणूक आयोगाने दिलेल्या आदेशानुसार सोलापूर महापालिका सार्वत्रिक निवडणूक 2025 साठी आवश्यक ती प्रक्रिया राबविण्यात येत आहे. दरम्यान, सन 2017 मध्ये झालेल्या सोलापूर महापालिका सार्वत्रिक निवडणुकीसाठी एकूण 6 लाख 73 हजार मतदार होते. यंदाच्या 2025 च्या निवडणुकी करिता मतदार मतदार संख्येत नैसर्गिक वाढ झाली आहे. 2 लाख 51 हजार मतदारांची वाढ यंदा झाली आहे. यंदा प्रारूप मतदार यादी मध्ये एकूण 9 लाख 24 हजार 706 मतदार असल्याचे स्पष्ट झाले आहे.
हरकती / सूचना निवडणूक मुख्य कार्यालय, डॉ. कोटणीस हॉल, आयसीआयसीआय बँकेच्यावर, सोलापूर या ठिकाणी स्वीकारण्यात येतील.
हरकती व सूचना दाखल करण्याची अंतिम मुदत दि. 27 नोव्हेंबरपर्यंत आहे. प्रभागनिहाय प्रारूप मतदार याद्या निवडणूक मुख्य कार्यालय, डॉ कोटणीस हॉल, आयसीआयसीआय बँकेच्यावर या ठिकाणी नागरिकांना विक्रीकरिता उपलब्ध करण्यात आले आहेत. मतदार यादीची प्रतिपृष्ठास दोन रूपये दराने विक्री करण्यात येणार आहे. प्रत्येक प्रभागाचे मतदारयादीचे फोटो नसलेले मतदारयादी सीडी, पेन ड्राईव्ह मध्ये 100 रुपये दराने उपलब्ध करण्यात येत आहे.
प्रारूप मतदारयादीची प्रसिध्दी महानगरपालिका मुख्य कार्यालयाचे सूचना फलक, विभागीय कार्यालय क्र. 1 ते 8 येथील सूचना फलक, स्थानिक वृत्तपत्र, स्थानिक टिव्हीवर करण्यात येणार आहे. ही यादी सोलापूर महानगरपालिका कौन्सिल हॉल या ठिकाणी पाहण्यासाठी उपलब्ध करण्यात येत आहे.याशिवाय ही यादी महानगरपालिकेच्या www.solapurcorporation.gov.in या संकेतस्थळावर देखील उपलब्ध करण्यात येणार आहे.
दरम्यान महापालिका कौशल अहवाल येथे लावण्यात आलेल्या प्रारूप मतदार याद्या पाहण्यासाठी नागरिक राजकीय कार्यकर्ते नेते यांची गर्दी झाल्याचे दिसून आले तर निवडणूक कार्यालयात मतदार यादी खरेदी करण्यासाठी नागरिक व राजकीय कार्यकर्त्यांची वर्दळ होती.
5 डिसेंबरला होणार अंतिम मतदारयादी जाहीर
प्रारूप मतदार यादीवरून दाखल हरकतीवर निर्णय घेऊन प्रभागनिहाय अंतिम मतदार याद्या अधिप्रामाणित करून 5 डिसेंबर प्रसिद्ध करण्यात येणार आहे. मतदान केंद्राच्या ठिकाणी यादी प्रसिद्ध करण्याची तारीख 8 डिसेंबर आहे तर मतदान केंद्रनिहाय मतदार यादी प्रसिद्ध करण्याची तारीख 12 डिसेंबर ही आहे. राज्य निवडणूक आयोगाचे सचिव सुरेश काकाणी यांनी मतदारयादीबाबत जाहीर केलेल्या सुधारित कार्यक्रमानुसार महापालिका स्तरावर कार्यवाही करण्यात येत आहे.
प्रभाग क्रमांक 20 मध्ये सर्वाधिक मतदार संख्या
प्रारूप मतदार यादी नुसार सर्वाधिक मतदार संख्या प्रभाग क्रमांक 20 मध्ये असून येथे 45 हजार 581 मतदार आहेत. त्या खालोखाल प्रभाग 8 मध्ये 42 हजार 714 , प्रभाग 12 मध्ये 40,637 तर प्रभाग 23 मध्ये 40,418 मतदार संख्या असल्याचे दिसून येते.एकूण 26 प्रभागांमध्ये मिळून एकूण पुरुष मतदार संख्या चार लाख 57 हजार 99 इतकी आहे स्त्री मतदार संख्या एकूण चार लाख 67 हजार 471 आहे इतर मतदार संख्या 136 आहे असे एकूण महापालिका निवडणुकीसाठी प्रारूप मतदार संख्या 9 लाख 24 हजार 706 इतकी आहे.
